O departamento de Deportes vén de abrir un novo prazo de inscrición nas Escolas deportivas municipais, tras rematar o primeiro período para anotarse. Neste segundo prazo poderán formalizar a matrícula todas aquelas persoas que non o fixeron na primeira quenda ou que quedaran excluídas desta. Tamén poderán anotarse aqueles/as aos/ás que xa se lles adxudicou praza noutra actividade (segunda actividade). Premendo nesta ligazón pódese consultar o folleto coa oferta de actividades das Escolas deportivas.

As persoas interesadas poden xestionar a matrícula de forma telemática a través do aplicativo de deportes do Concello de Ames, no apartado de escolas deportivas (recoméndase descargar a APP Concello de Ames para Android ou IOS). Tamén se poderá dar de alta en lista de espera nas actividades que xa teñan as súas prazas cubertas.

Unha vez que, habendo prazas libres, se obtivera praza no aplicativo, poderá realizarse o pagamento a través do propio aplicativo (TPV/bizum). Unha vez feito o trámite, xa se pode iniciar a actividade tendo en conta o calendario lectivo do programa.

Actividades ofertadas
As actividades comezarán o xoves 1 de outubro e rematarán o 12 de xuño de 2027. Nesta ocasión, as Escolas deportivas contan na categoría de formación deportiva con baile moderno, baloncesto, fútbol sala feminino, fútbol sala mixto, judo, natación, patinaxe, predeporte, tenis, taekwondo, voleibol, xadrez e ximnasia rítmica. 

Os maiores de 14 anos poderán inscribirse nas actividades do programa Ponte en Forma, que inclúe adestramento funcional; aerozumba; ioga, pilates; spinning, abdominais e glúteos; e ximnasia de mantemento.

As tarifas para o curso completo son de 80 euros para os maiores de 18 anos e de 60 euros para os menores de 18 anos. No caso do segundo membro da unidade familiar serían 30 euros e no dun terceiro membro e seguintes de 15 euros.