Ao abeiro do programa Apego, a Concellaría de Normalización Lingüística pon en marcha un ano máis as Brincadeiras Miúdas, unha xornada de música, baile, xogos tradicionais, creación de xoguetes que se celebrará na Carballeira de Ventín, detrás do colexio de Ventín. As brincadeiras comezarán cun concerto participativo de Cé Orquestra Pantasma e continuarán con xogos tradicionais, xogo libre e desestruturado e un espazo para a creación libre de xoguetes con materiais naturais. A actividade diríxese ao público familiar. A xornada é de balde e non precisa de inscrición previa. Celebrarase ás 18:00 horas e terá unha duración aproximada de hora e media. No caso de que as condicións meteorolóxicas non sexan favorables, a actividade aprazarase e realizarase nunha nova data. Nos vindeiros días anunciarase o resto da programación de Apego para o derradeiro cuadrimestre do ano.

Hoxe sábado, 14 de xuño, celebrouse no auditorio da Casa da Cultura do Milladoiro a gala de entrega de premios do XXII Certame Literario Concello de Ames, un acto literario-musical no que participaron 13 dos 18 gañadores nas modalidades de poesía e de narrativa. O evento estivo presentado pola xornalista de Ames Radio, Belén Martínez. Da parte musical encargouse o alumnado da Escola Municipal de Música de Ames. Participaron os alumnos e alumnas de iniciación da agrupación de violín, do grupo de combo folk e de música e movemento. Todos os textos premiados publicaranse nun libro colectivo que verá a luz no vindeiro mes de abril.

A Concellaría de Normalización Lingüística acaba de publicar a listaxe de persoas gañadoras da vixésimo segunda edición do Certame Literario de Ames. Na edición deste ano, recibíronse un total de 158 traballos, e foi na categoría de poesía para maiores de 18 anos na que houbo un maior número de participantes, con 72 obras recibidas. As persoas encargadas de xulgar os textos desta edición foron: María López Sández, Manuel Núñez Singala e Mariña Pérez Rei; as tres pertencentes ao ámbito literario e referentes na creación literaria galega actual. A entrega de premios estará presentada por Belén Martínez, xornalista de Ames Radio, e terá lugar este sábado, 14 de xuño, ás 12:30 horas, na Casa da Cultura do Milladoiro. Pódese descargar a acta completa do xurado na seguinte ligazón. 

O proxecto de investigación e acción para a promoción do galego na infancia desenvolto colaborativamente entre o Concello de Ames, a Real Academia Galega e os once centros educativos públicos amesáns, foi unha das experiencias premiadas na sexta edición dos Premios Mil Primaveras que se entregaron hoxe no Pazo da Cultura de Pontevedra. Os galardóns recoñeceron outros tres programas que inciden na infancia e na mocidade, favorecen a socialización en galego e potencian a reflexión e a posta en marcha de medidas para asociar a lingua con valores positivos: a canle de vídeos animados Galego para peques, a empresa de deseño e fabricación de xogos de mesa en galego Brazolinda e o programa do CEIP Sagrada Familia da Coruña Vitamina G.