O Concello de Ames pon en marcha un curso de redes sociais enmarcado dentro da sétima edición dos Premios Lingua e Empresa, unha iniciativa que promove o uso do galego na actividade empresarial amesá. O prazo para inscribirse nesta acción formativa está aberto ata o venres 15 de novembro ás 14.00 horas. Premendo nesta ligazón podes acceder ao formulario de inscrición. O curso impartirase o martes, 19 de novembro, de 19.00 a 21.00 horas, no espazo colaborativo A Proa, no Milladoiro e a docente será Carolina Buján Diéguez (especialista en marketing dixital e cofundadora de A Masa, Comunicación Artesanal). Está dirixido a empresas que teñan a súa sede ou centro de actividade no Concello de Ames. Ademais, ata o 21 de novembro continúa aberto o prazo para presentar candidaturas aos Premios Lingua e Empresa 2024. Poden optar a este recoñecemento todas as empresas con sede social ou un centro de actividade en Ames.

A mocidade de Ames xa pode inscribirse no V certame "GaleTiktokers", unha iniciativa coa que se pretende estimular a creatividade entre a xuventude, animar á creación de vídeos en galego con novos formatos e temáticas e darlle visibilidade á comunidade galega de tiktokers. Pode participar toda a mocidade entre os 13 e os 35 anos, e os seus vídeos serán valorados por un xurado composto por persoas recoñecidas no ámbito audiovisual galego e nas redes sociais. Para inscribirse no certame deberase enviar ao correo electrónico galetiktokers24@gmail.com a ficha de participación cuberta e asinada xunto co vídeo creado. O prazo de inscrición xa está aberto e rematará o vindeiro 4 de novembro de 2024. Os premios entregaranse nunha gala que terá lugar o 23 de novembro de 2024 na Casa da Cultura do Milladoiro.

O certame Galetiktokers, organizado polos departamentos de Mocidade e Normalización Lingüística de Ames, volve por quinto ano consecutivo co obxectivo de estimular a creatividade entre a mocidade, animar a creación de vídeos en galego con novos formatos e temáticas, e visibilizar a comunidade galega na rede social TikTok. A rapazada a partir dos 13 anos poderá participar cos seus vídeos en galego ata o 4 de novembro, enviando a súa creación audiovisual, xunto con esta ficha de participación, ao enderezo electrónico galetiktokers24@gmail.com. Haberá seis premios de 300 euros cada un, que se repartirán nunha gala que terá lugar o 23 novembro de 2024. Premendo nesta ligazón pódense consultar as bases ao compelto do V Certame Galetiktokers.

O Enreguéifate presentou este mediodía as novidades da súa oitava edición. O proxecto impulsado polos servizos de normalización lingüística dos concellos de Ames, Carballo, Pontevedra, Santiago de Compostela e Teo, reivindica o valor da improvisación oral en verso, a regueifa, como unha das expresións máis representativas da poesía popular oral galega e como unha vía para fomentar o uso da lingua galega, especialmente entre a mocidade.