A Asociación de Empresarios do Parque Empresarial do Milladoiro (AEPEM) convoca a undécima edición do Certame de Fotografía Comercial do Parque Empresarial do Milladoiro, unha iniciativa que ten como obxectivo achegar a realidade empresarial á cidadanía, a través da imaxe e poñer en valor a actividade económica, arquitectónica e humana deste importante enclave produtivo. As imaxes deberán enviarse por correo electrónico a foto@aenovomilladoiro.com, indicando no asunto “Certame fotográfico: título da fotografía”. O prazo de presentación permanecerá aberto do 27 de outubro ao 30 de novembro de 2025 ás 23:59 horas.

O Concello de Ames, a través da Concellaría de Promoción Económica, organiza a segunda edición do concurso de decoración de Samaín, unha iniciativa que fixo a súa estrea o ano pasado e gozou dunha gran acollida entre a veciñanza e os comerciantes amesáns. Deste xeito, preténdese fomentar o comercio local de Ames nunha das noites de maior consumo de todo o ano xunto coa de fin de ano. Repartiranse 2.000 euros en premios: 1.000 euros para o primeiro, 600 para o segundo e 400 para o terceiro. A decoración deberá estar exposta como mínimo dende o luns 27 de outubro ata o domingo 2 e novembro. As inscricións poderán tramitarse dende mañá, 16 de outubro, ata o vindeiro día 22. O motivo e decoración dos escaparates terán como tema principal a festa do Samaín.

A Xuntanza de Empresarios de Ames (XEA) celebrou este pasado martes, 7 de outubro, ás 20.30 horas, no Pazo da Peregrina de Bertamiráns o acto de presentación do seu recoñecemento oficial como Centro Comercial Aberto (CCA), unha distinción outorgada pola Xunta de Galicia, que acredita a consolidación da entidade como motor de dinamización comercial e social do municipio.

A Xuntanza de Empresarios de Ames (XEA), coa colaboración do Concello de Ames, lanza unha nova edición dos ‘Bonos Xeames’ para impulsar as compras no comercio local. Esta campaña repartirá en total 200 bonos Xeames para gastar nos comercios adheridos a XEA e estarán á venda ata o vindeiro 15 de outubro. Os bonos teñen un valor de 50 euros, dos cales o usuario pagará 40 euros e XEA agasallará os 10 euros restantes. A validez destas tarxetas será ata o 31 de outubro e poderán adquirirse na oficina de XEA, localizada na rúa do Pedregal, número 4, en Bertamiráns, de luns a venres en horario de mañá 9.30 a 13.30 horas; e luns, mércores e xoves tamén pola tarde en horario de 17.00 a 19.30 horas. Para máis información, pódese chamar ao número de teléfono 641 116 005.