Dende hoxe, venres 4, e ata o vindeiro venres 18 de outubro de 2024, está aberto o prazo para inscribirse no servizo de conciliación “Nadal Lúdico”, que se desenvolverá os días 23, 24, 26, 27, 30 e 31 de decembro, e os días 2, 3 e 7 de xaneiro de 2025. Poderán participar aquelas familias empadroadas no concello de Ames, con nenos e nenas escolarizados no segundo ciclo de educación infantil ou en primaria, e que teñan a necesidade de conciliar. O programa ten un horario de 7:30 a 16:00 horas, e inclúe os servizos de comedor e Bos Días. As persoas interesadas deben entregar a documentación necesaria na Sede electrónica do Concello de Ames, ou ben nas oficinas de asistencia en materia de rexistro do Concello de Ames (O Milladoiro e Bertamiráns). Pódese obter o impreso de inscrición premendo nesta ligazón.

O salón de plenos da Casa do Concello acolleu este pasado martes, 10 de setembro, unha nova xuntanza do Consello municipal de Educación, no que se falou sobre o inicio do curso escolar 2024/2025. O alcalde de Ames e a concelleira de Educación, Blas García e Carmen Porto, presidiron o Consello Escolar Municipal, xunto coa nova técnica de Educación, Natalia Quinteiro. Tamén participou Belén Agrafojo, persoal do departamento de Educación. Falouse do investimento feito polo Concello de Ames, que ascende a máis de 80.000 euros, para o mantemento de centros de ensino. Ademais, acordouse que no mes de outubro vaise fixar unha data para realizar a última xuntanza para abordar a modificación do regulamento da Rede municipal de comedores escolares, Bos Días Cole e Tardes Divertidas. Durante este mes poderanse presentar propostas para a modificación de dito regulamento.

A Concellaría de Xuventude do Concello de Ames propón neste mes de setembro unha nova actividade enmarcada dentro do programa Trouleando que conxuga natureza, deporte e diversión: unha xornada no Galipark en Padrón. Será o sábado 28, e ofrecerase servizo de autobús dende Bertamiráns e O Milladoiro. Os mozos e mozas interesados en participar deben anotarse enviando a ficha de inscrición cuberta ao enderezo electrónico xuventude@concellodeames.gal entre os días 13 e 18 de setembro. As prazas son limitadas e asignaranse por orde de chegada dos correos.

Do 28 de agosto ao 2 de setembro realizouse a última saída do programa municipal de campamentos de verán. Un grupo de 40 rapaces e rapazas de 6 a 14 anos estiveron no campamento da granxa escola El Kiriko. O programa de campamentos comezou o pasado 23 de xuño e ao longo dos meses de verán un total de 490 rapaces e rapazas de Ames participaron en 13 campamentos con estadía nocturna. Ademais, organizáronse dúas quendas para participar no campamento urbano da Aula da Natureza, entre o 1 e o 26 de xullo. Este ano cubríronse o 98% das prazas ofertadas, con 490 usuarios/as inscritos/as das 500 prazas existentes.