O acto terá lugar no Pazo da Peregrina, o xoves 15 de abril, ás 20:00 horas, coa presenza das autoras, a concelleira de Cultura de Ames, Natividade González, e a vicepresidenta da Asociación de escritores e escritoras en Lingua Galega, Anna R. Figueirido. Maria López Sández e Marilar Aleixandre escribiron conxuntamente este libro no que se afonda na vida e na obra de dona Emilia Pardo Bazán, prestando especial fincapé aos aspectos do seu pensamento feminista. A entrada ao acto é gratuíta e libre até completar o aforo limitado que, por mor da loita contra a pandemia, se aplica neste tipo de eventos.

O Pazo da Peregrina de Bertamiráns acollerá este mércores, 17 de marzo, ás 20:00 horas, a presentación de Libres e Vivas, unha obra coral escrita por 10 autoras que, desde diferentes puntos de vista, falan da igualdade e da violencia machista. O libro, publicado pola editorial Galaxia, aborda a cuestión do machismo, do terrorismo patriarcal contra as mulleres, da liberdade e da igualdade, para que, dende a literatura, entendamos como é o seu sentir.

As bibliotecas municipais do Concello de Ames organizaron unha serie de actividades para o mes de marzo relacionadas coas dúas grandes celebracións do mes: o Día da Muller e o Día da Poesía. Dita programación recolle varias presentacións. O 10 de marzo realizarase a presentación da obra Irmandiñas, con Aurora Marco, acompañada do grupo musical Barahúnda. O 17 de marzo presentarase a obra Libres e Vivas coa presentación de varias autoras. As dúas presentacións serán no Pazo da Peregrina, ás 20.00 horas. Ademais, o 12 de marzo, ás 20.00 horas, proxectarase na Casa da Cultura do Milladoiro o documental Vértices de Versos sobre a poesía galega contemporánea, mentres que o martes 23 de marzo, tamén no Pazo da Peregrina, realizarase unha sesión de recitais de poesía e faladoiro sobre a poesía actual en Galicia.

As bibliotecas municipais seguen a organizar unha serie de sesións de contacontos infantís na rede todos os mércores. Baixo o título de “Dixicontos”, os usuarios e usuarias poderán acceder a esta actividade a través da páxina de Facebook da biblioteca. Este mércores, 3 de marzo, pódese ver o conto Galo Quirico.