Actualidad

Por ejemplo, 29-03-2024
Por ejemplo, 29-03-2024
Jueves, 16 de noviembre de 2023
Imaxe da reunión coa xunta directiva da Asociación de empresarios do parque empresarial Novo Milladoiro

O alcalde de Ames, Blas García, xunto cos concelleiros de Urbanismo, Víctor Fernández, de Obras e Servizos Básicos, Gustavo Nieto, e da concelleira de Promoción Económica, Ana Belén Paz, mantiveron unha xuntanza co presidente, Javier Santos, e outros representantes da xunta directiva da Asociación de empresarios do parque empresarial Novo Milladoiro para informar das actuacións relativas á humanización da N-550, así como do ramal de acceso ao polígono correspondente á mellora da intersección da estrada SC-20, PK 10+350 coa estrada N-550 PK 67+150, que foi aprobado definitivamente polo Ministerio de Transportes, Mobilidade e Axenda Urbana no pasado mes de outubro.

Martes, 31 de octubre de 2023
Imaxe da presentación do proxecto de humanización

O Goberno municipal presentou esta mañá o proxecto de humanización da contorna das rúas Madalena, Estivada de Castelao e das Camelias, integrando a praza da Madalena, o parque de Estivada de Castelao e mailos espazos públicos que lindan coas mesmas. O proxecto, constará de varias fases. A primeira, a expropiación do inmoble situado na rúa da Madalena número 6, está vinculada ao Ames Progresas 2021 – 2023. Posteriormente procederase ao seu derribo e, por último, licitarase o proxecto de execución das obras de reurbanización das prazas e rúas desta zona do Milladoiro. O principal obxectivo do proxecto é buscar un deseño que sexa comprensible, utilizable e accesible por todos os usuarios, garantindo a seguridade e comodidade dos mesmos. Premendo nesta ligazón podes consultar un vídeo explicativo do proxecto.

Jueves, 22 de junio de 2023
Imaxe dunha cacharela na celebración do San Xoán 2022 na parroquia de Ortoño

Achégase a noite máis longa do ano, o 23 de xuño, a véspera de San Xoán. E como manda a tradición esta festividade celébrase saltando as tan típicas cacharelas e comendo a sardiñada que soe acompañar. Este ano concedéronse un total de 229 permisos para realizar cacharelas na noite do 23 de xuño. Está previsto que haxa 209 en parcelas privadas do rural e da zona urbana e 20 en espazos públicos. A separación entre as cacharelas, edificios, árbores, vehículos e mobiliario urbano serán como mínimo de 12 metros, agás no casco urbano. Ademais, as persoas responsables de cada lumieira deberán vixiar o lume ata a total extinción do mesmo e ter a man os teléfonos da Policía Local, Protección Civil e Emerxencias. Preme nesta ligazón para descargar o bando coas normas para realizar cacharelas no San Xoán.

Jueves, 19 de enero de 2023
Parcela do parque empresarial do Milladoiro onde se están construíndo 9 novas naves

A Xunta de Goberno Local concedeulle a Santiago Sur Galicia SL licenza de edificación de nove naves no parque empresarial do Milladoiro. Concretamente a parcela, que foi segregada previamente, está situada na intersección da rúa Oliveira coa rúa das Palmeiras. En total vanse edificar máis de 5.600 m2 de superficie. Unha obra que ascende a preto de 1.500.000 euros. O outorgamento desta licenza supón un novo impulso ao parque empresarial do Novo Milladoiro despois da concesión de licenza para a construción dun hotel de 82 habitacións.

Viernes, 23 de septiembre de 2022
Imaxe da presentación do proxecto

A secretaria de Estado de Transportes, Mobilidade e Axenda Urbana, Isabel Pardo de Vera, e o delegado do Goberno en Galicia, José Miñones, visitaron hoxe o concello de Ames, onde anunciaron a inclusión da obra de humanización da avenida Rosalía de Castro, no Milladoiro, nos investimentos do Plan de Recuperación, Transformación e Resiliencia. Reuníronse co alcalde de Ames, Blas García, a quen lle avanzaron esta decisión que impulsará esta obra, longamente demandada pola Corporación municipal e por toda a poboación do Milladoiro, e na que o Ministerio de Transportes, Mobilidade e Axenda Urbana investirá 7,88 millóns de euros.

Sábado, 06 de agosto de 2022
Infografía da fase 1 da obra para a creación dunha améndoa central no núcleo urbano de Bertamiráns

Na Xunta de Goberno Local celebrada este xoves 4 de agosto de 2022, aprobouse o expediente de licitación, mediante procedemento aberto simplificado da obra para a creación dunha améndoa central no núcleo urbano de Bertamiráns que estará cofinanciado polo Fondo Europeo de Desenvolvemento Rexional (FEDER) no marco do Programa Operativo Plurirrexional de España 2014-2020.

Viernes, 17 de junio de 2022
Acórdanse novos horarios para a apertura das terrazas

O alcalde de Ames, Blas García, o concelleiro de Urbanismo, Víctor Fernández, e maila concelleira de Promoción Económica, Ana Belén Paz, mantiveron unha xuntanza coa Xuntanza de Empresarios de Ames (XEA) e coa Asociación Empresarial da Restauración, Aloxamento e Turismo de Compostela e Comarcas “Hostalaria.Gal”. En dito encontro chegaron a un acordo para a modificación do horario das terrazas dos establecementos hostaleiros durante todo o ano. O horario de apertura todos os días do ano será ás 9.00 horas. O horario de peche será diferente segundo a temporada. Na temporada 1, de outubro a marzo, pecharase as 00:00h de domingo a xoves, e a 01:00h os venres, sábados e vésperas de festivo. Na temporada 2, de abril a setembro, as terrazas pecharán a 01:00h de domingo a xoves, e ás 2.00h  os venres, sábados e vésperas de festivo.

Viernes, 08 de abril de 2022
O Goberno municipal visita en Biduído a construción da primeira “passivhaus” de Galicia con piñeiro autóctono

O pasado xoves 31 de marzo, varios representantes do Concello de Ames desprazáronse ata Biduído de Arriba, na parroquia de Biduído, para visitar as obras da primeira vivenda construída con piñeiro galego baixo o estándar de construción “passivhaus” (casa pasiva en alemán). Estes inmobles contan cunha alta capacidade de illamento, que permiten aforrar ata un 75 por cento do consumo enerxético en calefacción e refrixeración. Ademais, para esta edificación recorreuse a madeira certificada co selo de calidade Pino de Galicia, nunha aposta pola construción sustentable e a industria forestal galega.

Lunes, 04 de abril de 2022
Asínase un convenio con ARECAFÉ para a recollida selectiva de cápsulas de café e a súa correcta xestión

O Concello de Ames vén de asinar un convenio de colaboración con  ARECAFÉ (Alianza para a reciclaxe de cápsulas de café) co obxectivo de poder recoller de forma separada as cápsulas de café de calquera marca, tanto de aluminio como de plástico. Ames é o primeiro concello de Galicia en asinar este convenio e en implantar un sistema de recollida selectiva deste tipo de residuos. Preténdese facer unha correcta xestión destes materiais de plástico e aluminio para a súa reciclaxe.

Sábado, 26 de febrero de 2022
Plano do novo centro comercial de Gadisa en Bertamiráns

A semana pasada comezaron as obras nunha céntrica parcela de Bertamiráns para construír un novo centro comercial de Gadis nesta localidade. Deste xeito, unha empresa punteira no sector comercial como é Gadisa construirá un novo centro nesta localidade ampliando a oferta comercial existente na actualidade. O edificio, que terá acceso dende O Pedregal e dende a avenida da Maía, disporá de soto, planta baixa e primeira planta. Haberá un aparcamento exterior e outro no soto do edificio. Ambos aparcamentos suman 113 prazas de estacionamento. A planta baixa contará cunha superficie de 1.588 metros cadrados que acollerán un supermercado cunha superficie de venta de 970 metros cadrados e un aforo total de 367 persoas. O proxecto ten un orzamento de execución material de 1.404.001 euros.