[14-01-2019] O centro de depósito de residuos do Punto Limpo, situado no polígono do Milladoiro, continúa a rexistrar uns magníficos datos que amosan a concienciación da cidadanía amesá co medio. No mes de decembro, 492 usuarios/as fixeron uso deste servizo. Das achegas feitas ao longo do pasado mes destacan fundamentalmente os residuos eléctricos e electrónicos que se achegaron aos 2.891 quilogramos. Este servizo municipal está xestionado pola empresa Urbaser.

A Xunta de Goberno Local aprobou o pasado 13 de decembro os expedientes de licitación, por procedemento aberto simplificado, das obras para a construción de dous anfiteatros para a mocidade en Bertamiráns e Milladoiro, así como o contrato de subministro de luminarias para distintos lugares das parroquias do Concello, como Ameixenda, Ames e Biduido. Estas actuacións foron escollidas pola veciñanza amesá dentro do Proceso de Orzamentos Participativos 2018.

[11-01-2019] Para recibir o 2019 con enerxía, Rutas a Pie, en colaboración coa Concellaría de Promoción Económica e Turismo, imparte esta fin de semana un curso de iniciación ao uso do GPS, aplicado á práctica do sendeirismo, que se realiza o sábado 12 e o domingo 13 de xaneiro. Esta actividade terá lugar no Centro de Formación e Emprego de Aldea Nova, en horario de 09:30h a 19:00 horas.

[11-01-2019] Un total de oitenta familias foron atendidas dentro do programa Educación Familiar, do Concello de Ames ao longo de 2018. A través deste servizo, o departamento de Servizos Sociais ten un contacto directo coas familias, mediante o que lles presta apoio educativo e psicosocial , co obxectivo de detectar, previr e superar as situacións de dificultade, especialmente as eventuais de maltrato infantil, ou calquera outra desprotección, así como promover procesos de cambio que favorezan un axeitado exercicio de responsabilidades familiares, a mellora da autonomía, da integración e da participación social das familias e unidades de convivencia ca introdución da perspectiva de xénero.