O centro de depósito de residuos do Punto Limpo rexistrou 950 entradas en outubro. Durante o pasado mes destaca a achega de 3.433 quilogramos de madeira, 3.256 quilogramos de lixo procedente da construción (formigón, ladrillos e outros), 1.678 quilogramos de metais e 1.125 unidades de pequenos aparatos eléctricos e electrónicos (PAES). Ademais, a través do Punto Limpo móbil recolléronse diferentes residuos en 6 entradas.

A cuarta edición da feira “Tanto monte, monte tanto”  prevista inicialmente para os días 23 e 24 de novembro no campo da festa de Trasmonte tivo que ser reducida a unha única xornada debido ás condicións meteorolóxicas adversas que se manifestaron durante o domingo, 24 de novembro. Perse a esta circunstancia, o evento co que o Concello de Ames quixo valorizar e difundir a importancia social, ambiental, cultural e económica do monte, bateu todos os rexistro de afluencias das edicións pasadas, duplicando á asistencia do 2023 e triplicando a do 2022. Premendo nesta ligazón pódese acceder á galería de imaxes da Feira do Monte 2024.

Punheta, Galibrownie, Mil e un instrumentos, As princesas tamén falan galego, Ven falar galego e Fitness da nosa terra son os vídeos gañadores do Galetiktokers 2024. Os premiados déronse a coñecer nunha gala celebrada hoxe sábado, 23 de novembro, na Casa da Cultura do Milladoiro, que estivo presentada e dirixida polas/os creadoras/es de contido en galego, Nuria Grandío @konachadas e Rodri Míguez @rodrimiguez97, e amenizado polo rapeiro amesán Big Meu. Asistiron o alcalde e concelleiro de Normalización Lingüística, Blas García, e maila concelleira de Mocidade, Carmen Porto. En total repartíronse 1.800 euros en premios.

A Casa da Cultura de Bertamiráns acolle ao longo da xornada de hoxe unha das actividades programadas polo Concello en conmemoración do Día internacional da eliminación da violencia contra as mulleres, a XIV Xornadas “Achégate á igualdade”, que este ano tiveron como lema “A prevención da violencia de xénero desde a ética dos coidados”. Unha edición orientada especialmente á concienciación entre a mocidade da violencia sexual e que contou coa participación do alumnado dos institutos de Bertamiráns e do Milladoiro. As xornadas comezaron cunha mesa de apertura institucional na que participaron o alcalde de Ames, Blas García, a concelleira de Benestar Social e Igualdade, Uxía García, a subdelegada do Goberno na provincia da Coruña, María Rivas, e a directora xeral de Promoción da Igualdade, María Quintiana Pérez.