O Concello de Ames, a través do departamento de Normalización Lingüística, organiza a VII edición dos Premios Lingua e Empresa do Concello de Ames, unha iniciativa que pon en valor o uso da lingua galega dentro do ámbito empresarial local. Desta volta, presentáronse 34 empresas, unha máis que na edición do pasado 2023 á que se presentaron 33 entidades, consolidando así estes premios como un incentivo para promover o uso do galego no tecido comercial de Ames. As empresas gañadoras desta edición coñeceranse na Gala Lingua e Empresa que se celebrará o vindeiro 12 de decembro ás 20.30 na Casa da Cultura do Milladoiro. En ambas categorías o premio é unha contía de 1.500 euros xunto cunha campaña publicitaria en Ames Radio, a emisora municipal. As empresas participantes poden consultarse na seguinte ligazón.

A Corporación municipal aprobou por unanimidade a ratificación de dous decretos para a subsanación de deficiencias no proxecto das obras de melloras no edificio da Escola de Musica situado en Aldea nova; a aprobación inicial da ordenanza xeral de subvencións; a creación do Consello Sectorial da Xuventude; e a compatibilidade de Iván Pablo Sanmartín Carreira, animador e preparador deportivo. Ademais, aprobouse por maioría a revisión do IPC, de xullo 2023 a xullo de 2024, relativo ao contrato de concesión da xestión e mantemento do centro deportivo municipal A Telleira; e a aprobación inicial da modificación da ordenanza reguladora do prezo público pola utilización do centro deportivo municipal A Telleira. Tamén se aprobaron por unanimidade tres declaracións institucionais sobre o Día mundial da infancia 2024; o 25N - Dia Internacional para a eliminación da violencia contra a muller; e en solidariedade e apoio á veciñanza e aos Concellos afectados pola DANA. Por último, aprobouse por maioría unha moción política relativa á situación do idioma propio da Galiza e á adopción de medidas para a súa normalización. Podes ver a gravación do pleno na canle de Youtube do Concello de Ames.

O Concello de Ames, en colaboración con La Voz de Galicia, vai celebrar o vindeiro mércores, 4 de decembro, no auditorio da Casa da Cultura do Milladoiro, un foro sobre benestar emocional e saúde mental. Ás 11.00 horas abrirase o foro cunha mesa de apertura institucional, para dar paso a unha mesa política e outra de deportistas. O peche institucional e clausura será ás 13.15 horas. Este foro súmase a outras iniciativas postas en marcha polo Concello de Ames sobre saúde mental como son o plan municipal de benestar emocional e saúde mental do Concello de Ames, que é pioneiro a nivel galego, e mailas Xornadas de Saúde Mental que xa van pola terceira edición e se celebraron no pasado mes de maio.

O Concello de Ames finaliza este venres 29 de novembro a súa programación teatral deste segundo semestre do 2024, deseñada polo departamento de Cultura, coa representación da obra “Testosterona”, de Malasombra Producións, ás 20.30 horas, no auditorio da Casa da Cultura de Bertamiráns. O espectáculo pecha o programa de artes escénicas do municipio destes derradeiros meses do ano e súmase así ás obras xa representadas este pasado mes de outubro, “Geometría del alma” e “Go Home”. Este espectáculo enmárcanse dentro da programación da Rede Galega de Teatros, subvencionada pola Axencia Galega das Industrias Culturais (AGADIC).