Esta mañá celebrouse no auditorio da Casa da Cultura do Milladoiro o foro de “Saúde mental baixo o foco” do Concello de Ames, en colaboración con La Voz de Galicia. Neste evento púxose o foco na importancia da prevención e visibilización dos problemas de saúde mental, así como o traballo que se está a desenvolver dende os concellos para detectar e axudar a diminuír os problemas de saúde mental entre os seus habitantes. Así mesmo, falouse da importancia do benestar emocional no mundo do deporte. O foro comezou cunha apertura na que interviron o alcalde de Ames, Blas García; a concelleira de Promoción da Saúde, Susana Señorís e os fundadores da entidade CoidadosAmente, Belén Montesa e Juan Carlos Permuy.

A Aula Municipal Tecnolóxica da Información e da Comunicación (Aula AMTIC) do Concello de Ames, situada no Milladoiro, oferta para este mes de decembro novos cursos formativos, un para adultos e tres para os máis cativos. Para o obradoiro de compras seguras a través da Internet, que está dirixido a persoas adultas, aínda quedan prazas libres. Este curso impartirase os días 11, 12 e 18 de decembro, en horario de 10.00 a 12.00 horas. Pódese facer a inscrición a través do número de teléfono 674 59 48 43, escribindo un correo electrónico a informatica.milladoiro@gmail.com, coa correspondente ficha de solicitude cuberta e asinada, ou de xeito presencial na propia aula AMTIC do Milladoiro.

O pasado xoves, 28 de novembro, a Asociación de Empresarios Novo Milladoiro celebrou unha nova edición dos Premios á Distinción Empresarial, un evento que busca poñer en valor o traballo e compromiso das empresas da nosa contorna. Este ano, a empresa homenaxeada foi GST Telecomunicaciones, un referente no sector das telecomunicacións grazas ao seu servizo de instalacións e mantemento de sistemas avanzados e equipos tecnolóxicos de calidade. En dito acto participaron o presidente da presidente da Asociación de Empresarios Novo Milladoiro, Javier Santos, o alcalde de Ames, Blas García, e representantes das empresas asociadas.

Ames presentou esta mañá no salón de Plenos da Casa do Concello a súa programación para as festas de Nadal deste ano. O programa, organizado por varios departamentos municipais, inclúe múltiples actividades dirixidas para todo tipo de públicos que se desenvolverán ao longo de todo o mes de decembro e comezos de xaneiro e que teñen como obxectivo dinamizar as rúas de Ames nestas datas tan sinaladas. No acto participaron o alcalde de Ames e concelleiro de Cultura, Blas García; a concelleira de Promoción Económica, Ana Belén Paz e a concelleira de Deportes e Promoción da Saúde, Susana Señorís. A programación pódese consultar ao completo premendo nesta ligazón.