O Goberno de Ames lembra á cidadanía que o concello se atopa en nivel de restricións medio e as normas de cumprimento obrigatorio que hai que seguir mantendo para loitar contra a COVID-19. A normativa actual obriga a que os grupos sexan de ata 6 persoas en espazos pechados e ata 10 persoas ao aire libre. Os establecementos, tanto bares como restaurantes poderán prestar servizo co 50% da capacidade máxima permitida. As barras continúan pechadas, nas terrazas permítense grupos de 10 persoas e nos interiores dos locais de 6. Cómpre salientar que o uso da máscara segue a ser obrigatorio excepto en exteriores e sempre que se poida gardar a distancia de seguridade interpersoal de 1,5 metros. Poden consultar aquí todas as medidas adoptadas pola Xunta de Galicia que afectan ao Concello de Ames na actualidade.

O novo programa Propulsa Danza Paisaxe Patrimonio, da Xunta, levará a danza de 4 compañías ao Pazo da Peregrina de Bertamiráns o 24 de xullo. Dende as 19.00 horas, a veciñanza poderá desfrutar do primeiro espectáculo será E-migrantas, de Kirenia Danza, seguido polo espectáculo Miñaxoia, de Clara Ferrao. Tamén se interpretará a actuación Nexos, de Cía Exire e, por último, o espectáculo Canela, de Laboratori Escénico Coop.

O Concello de Ames quere neste ano 2021 recoñecer a traxectoria do catedrático e cofundador do Instituto da Lingua Galega, Ramón Lorenzo, cunha recepción oficial. Será no transcurso do acto de celebración do Día de Galicia en Ames que terá lugar o luns 26 de xullo a partir das 20:30 no Pazo da Peregrina. Ao acto asistirá a corporación municipal e falarán os voceiros dos grupos políticos con representación municipal. A música correrá a cargo do Grupo Barahúnda.

O programa “AmesON” continúa este venres 23 de xullo co concerto de Ellas Son. O grupo formado por Begoña García e Cristina Cachaldora será o encargado de poñerlle música e ritmos latinos á noite amesá. O concerto celebrarase na praza de Manuel Murguía, no Milladoiro, ás 20.00 horas.