Youtubeiras, proxecto organizado polos servizos de Normalización Lingüística de nove concellos, entre os que se inclúe Ames; das tres universidades galegas e da Deputación da Coruña co obxectivo de fomentar a creación en galego no YouTube con temáticas e formatos diversos, así como de promover e visibilizar os diferentes perfís de persoas xeradoras de contidos na Rede, pon en marcha tanto unha nova edición dos seus premios como o programa de visitas de difusión e formación a centros de ensino para achegarlle á rapazada o traballo de youtubeiros e youtubeiras de gran repercusión na nosa lingua.

O programa Apego continúa a súa programación para o mes de setembro co espectáculo “C@nto Contigo”, que terá lugar o vindeiro venres, día 15, na Casa da Cultura do Milladoiro, ás 18:00 horas. Trátase dun espectáculo de Paco Nogueiras para público familiar. O prazo para anotarse está aberto dende hoxe, 7 de setembro, ata o día 14. As persoas interesadas en participar deben enviar un correo electrónico ao enderezo normalizacion@concellodeames.gal no que se indiquen nome e apelidos das persoas asistentes, idades dos nenos/as e un número de teléfono de contacto. A programación do Apego para o último semestre do 2023 pode consultarse premendo nesta ligazón.

O Concello de Ames presentou as propostas que compoñen a programación infantil con Apego de Ames para os meses de setembro, outubro, novembro e decembro de 2023, que inclúen dende xogos, contos, obradoiros, espectáculos musicais e teatrais e foliadas ata maxia ou cinema. O programa abre a vindeira semana coas “Brincadeiras miúdas” de Cé Orquestra Pantasma e a cooperativa Miudiño, que serán o mércores 6 no parque do Ameneiral de Bertamiráns, e o xoves 7 na carballeira de Ventín do Milladoiro. Comezarán ambos días ás 18:00 horas, son de balde e non se precisa inscrición previa. A programación ao completo pode consultarse premendo nesta ligazón.

O concerto “Un soño é...” de Uxía Lambona e a Banda Molona, que pecha a programación Apego deste semestre e serve tamén de clausura do programa Modo Galego, Actívao, realizarase en exterior, na praza de Chavián de Bertamiráns, este sábado 17 de xuño, ás 19.00 horas. Isto permite ampliar o aforo e que todas aquelas familias que queiran poidan asistir libremente. A entrada será libre e gratuíta. Dende o departamento de Normalización Lingüística indican que unhas 700 persoas solicitaron poder asistir a dito concerto, polo que se agarda que máis dun milleiro de persoas acudan a ver o espectáculo de Uxía Lambona e a Banda Molona.