A programación de Nadal en Ames este ano conta coa novidade da celebración dun Mercado de Nadal na praza da Maía durante esta fin de semana. En total hai 18 postos; 13 de artesanía e 5 postos de alimentación e produtos da horta. O horario de atención ao público do Mercado de Nadal este sábado e domingo é de 10.00 a 14.00h e de 17.00 a 20.30 horas. Este sábado, ás 13.00 horas, celebrouse o acto de apertura de dito mercado. Trátase de incrementar a oferta comercial do concello con produtos de artesanía e de alimentación frescos e de proximidade.

O auditorio da Casa da Cultura do Milladoiro acolleu este pasado xoves, 18 de decembro, o acto de entrega de premios da XI edición do Certame de Fotografía Comercial da Asociación de Empresarios do parque empresarial Novo Milladoiro. Un acto que estivo presentado polo cantautor e monologuista Manolo Boquete e no que se proxectaron todas as imaxes presentadas ao concurso. As fotografías gañadoras foron A Forxa da luz, Fin de xornada e Xagal. En representación do Goberno municipal asistiron o alcalde de Ames, Blas García, a concelleira de Promoción Económica, Ana Belén Paz, e o concelleiro de Obras e Servizos Básicos, Gustavo Nieto.

O Concello de Ames, a través da Concellaría de Promoción Económica, desenvolve un ano máis a campaña dos Bonos Consuma, unha iniciativa para fomentar o consumo no comercio local. O prazo para descargar os bonos estará aberto desde mañá, venres 19 de decembro. Cada persoa maior de 18 anos poderá descargar un único bono con importe de 50 euros que poderá usar nos 109 establecementos adheridos á campaña deste ano. Para descargar os bonos hai que entrar no apartado de clientes da páxina web dos bonos consuma e introducir os datos persoais do beneficiario. Os bonos poderán gastarse do 19 de decembro ao 19 de febreiro de 2026, ou ata que se esgote o orzamento do programa. Este ano o orzamento da campaña é de 60.000 euros. No caso de que se esgote o orzamento do programa, os vales descargados deixarán de ter saldo, polo que non se poderán empregar. Pódese consultar as empresas adheridas á campaña na seguinte ligazón.

O Concello de Ames, a través da Concellaría de Promoción Económica, presentou está mañá, no salón de plenos da Casa do Concello, en Bertamiráns, a programación da que será a quinta edición das Prebadaladas de fin de ano o próximo 31 de decembro, a partir das 11.30 horas da mañá. Unha actividade que se enmarca dentro da programación das festas de Nadal e que estará presentada pola cantante e artista Fátima Pego. Nesta ocasión contarase coa actuación do grupo galego The Crooners e dos gañadores/as do concurso Baila con Ames 2025. Como xa vén sucedendo en edicións anteriores, haberá cotillón, arandos, lambetadas e mochilas vibratorias para as persoas con discapacidade auditiva e intérprete de lingua de signos. Ás Prebadaladas deste ano súmanse novas iniciativas como o Tardeo da praza do Concello e maila Festa de Fin de Ano, que se vai celebrar no pavillón municipal de Bertamiráns, e para a que xa se venderon 800 entradas. As Prebadaladas deste ano contarán co apoio de Mahou, Feiraco,  Asador Vacavella e a froitería Tómate más Fruta.