Este mércores 31 de xullo o Concello de Ames celebrará o pleno ordinario correspondente ao mes de xullo. Na sesión plenaria, a Corporación municipal debaterá sobre a fixación dos festivos locais para o ano 2025; a concesión da medalla do Concello de Ames 2024 á Borja Golán Santín; a solicitude de participación na segunda fase do POS+ Adicional 2/2024; a aprobación da modificación da base número 50 do orzamento municipal de 2024 relativa a subvencións nominativas; a cuarta prórroga da concesión administrativa da xestión e mantemento do Centro deportivo municipal A Telleira; e a concesión de obra para a construción da instalación deportiva municipal de O Milladoiro e explotación do conxunto deportivo que conformará a obra xunto a instalación municipal A Telleira de Bertamiráns. Ademais, debateranse tres mocións. Dúas foron presentadas polo grupo municipal do BNG: unha para crear o Consello de participación e transparencia; e outra sobre a xestión real e efectiva das colonias felinas no rural de Ames. A terceira moción do grupo municipal popular trata sobre as medidas a adoptar polo Concello de Ames e a Xunta de Galicia na loita contra o munifundismo no municipio amesán. O pleno será emitido en directo a través da canle de YouTube do Concello de Ames.

Este xoves, día 27, o Concello de Ames celebrará o pleno ordinario correspondente ao mes de xuño. Na sesión plenaria, a Corporación municipal debaterá sobre a aprobación do crédito extraordinario 1/2024, o proxecto de mellora da mobilidade no parque empresarial do Milladoiro, a corrección de erros no texto da ordenanza reguladora do prezo público pola prestación do servizo das escolas infantís municipais, a primeira prórroga do lote 1 do servizo de monitores e persoal na rede de comedores escolares e do lote 3 de servizo de monitores e merendas no programa de Tardes Divertidas. Tamén se abordará o expediente para a elección de xuíz/a substituto/a do Concello de Ames, o convenio de colaboración para a xestión compartida da promoción turística da ruta rosaliana As pegadas de Rosalía e a modificación da ordenanza para a protección dos camiños e vías públicas municipais do concello de Ames. O pleno será emitido en directo a través da canle de YouTube do Concello de Ames.

Este xoves, 13 de xuño, celebrarase un pleno extraordinario no que a Corporación municipal debaterá sobre a aprobación do documento definitivo da Axenda Urbana 2030, que é o documento que marcará a estratexia e as accións a levar a cabo ata 2030, para facer de Ames un concello de convivencia amable, acolledor e máis saudable. Esta folla de ruta naceu como resultado dun proceso participativo no que se implicou ao persoal técnico do Concello e Ames e ao tecido asociativo do municipio co obxectivo de pulsar a súa opinión e de que achegasen propostas e suxestións de cara á redacción do documento definitivo da diagnose. A presentación da Axenda Urbana 2030 realizouse este pasado martes, 11 de xuño, no Pazo da Peregrina. O pleno será emitido en directo a través da canle de YouTube do Concello de Ames.

O salón de plenos da Casa do Concello acolleu este pasado xoves, 30 de maio, o pleno ordinario deste mes de maio. Esta sesión plenaria estivo marcada pola toma de posesión de Carlos García Vieito, como concelleiro do grupo municipal do BNG, e pola moción de reprobación da concelleira de Educación, Carmen Porto, que foi o punto que máis debate xerou e que finalmente foi rexeitada. Ademais, aprobouse o regulamento de uso e funcionamento da Factoría; a revisión de prezos do contrato de xestión e mantemento do centro deportivo municipal A Telleira (exercicios 2019 e 2020) e o recoñecemento extraxudicial de crédito 1/2024, por valor de 134.060 euros. Por último, aprobouse a declaración institucional de apoio ás persoas enfermas de ELA e a moción do grupo municipal socialista de solidariedade co pobo palestino. Podes ver a gravación do pleno na canle de Youtube do Concello de Ames.