O Concello de Ames, a través da súa entidade pública Augas de Ames EPEL, patrocinará durante a tempada 2026-2027 ao equipo feminino do Milladoiro Sociedade Deportiva (Milladoiro SD), nunha aposta pola promoción do deporte feminino, a igualdade e a sensibilización da cidadanía sobre a importancia de facer un consumo responsable da auga.

O acordo foi presentado no campo de fútbol de Milladoiro nun acto no que participaron por parte do Concello o alcalde e presidente de Augas de Ames, Blas García; o concelleiro de Obras e Servizos Básicos, Gustavo Nieto; a xerente de Augas de Ames, Genma Otero; a técnica xefa de servizo, Verónica Castro; e o capataz da entidade, Ricardo Tosar.

Por parte do Milladoiro SD participaron o presidente do Milladoiro SD, José Manuel Dacosta; o tesoureiro, Leopoldo Jiménez; o vogal e responsable de redes sociais, Aaron Silva; o coordinador, José Ramón Zas; e mailo adestrador do equipo, Pere Tobaruela.

A través deste patrocinio, Augas de Ames converterase en patrocinador institucional do equipo feminino do Milladoiro SD durante a tempada 2026-2027, un equipo que compite en divisións galegas e que contribúe a levar o nome de Ames por diferentes puntos da comunidade.

O acordo contempla a presenza destacada do logotipo e da mensaxe promocional de Augas de Ames nas camisetas de xogo, así como nas diferentes accións de comunicación e difusión que se desenvolvan ao longo da tempada. O club tamén promoverá a entidade nas súas mensaxes a través das súas redes sociais e outros soportes de comunicación.

Do mesmo xeito, Augas de Ames poderá incorporar na súa páxina web información e publicidade dos eventos deportivos organizados polo club, mentres que o Concello de Ames e Augas de Ames disporán de seis entradas para cada partido que o equipo dispute en Ames.

Blas García, alcalde de Ames e presidente de Augas de Ames indica “con este patrocinio queremos apoiar o deporte de equipo feminino e, ao mesmo tempo, aproveitar a capacidade de difusión que ten o deporte para trasladar á cidadanía unha mensaxe fundamental: a auga é un recurso básico e esencial que debemos coidar e utilizar de maneira responsable”.

Un compromiso coa igualdade e co deporte feminino
Con este patrocinio, Augas de Ames quere contribuír ao impulso do deporte feminino e da igualdade no ámbito deportivo, apoiando un club que conta cunha traxectoria consolidada e que desenvolve a súa actividade deportiva no municipio.

A aposta polo Milladoiro SD responde tamén ao compromiso da entidade pública coa promoción de valores vinculados á igualdade e á participación das mulleres no deporte. Neste sentido, o patrocinio pretende contribuír a visibilizar o deporte feminino de equipo. 

Sensibilizar sobre o consumo responsable da auga
A colaboración co Milladoiro SD permitirá tamén a Augas de Ames trasladar á cidadanía unha das súas principais liñas de actuación: a sensibilización sobre o consumo responsable da auga.

Neste marco, a entidade considera fundamental promover hábitos responsables no uso da auga e concienciar sobre a necesidade de protexer un recurso limitado e imprescindible para a vida.

A presenza de Augas de Ames nos equipamentos, comunicacións e actividades do equipo feminino do Milladoiro SD permitirá así combinar deporte, saúde, igualdade e concienciación ambiental, facendo chegar estas mensaxes a diferentes públicos e espazos.

Gustavo Nieto, concelleiro de Obras e Servizos Básicos expón que “o deporte feminino merece visibilidade e oportunidades. Desde o Concello de Ames e desde Augas de Ames queremos contribuír co noso apoio e colaboración apostando polo deporte feminino de equipo e reducir as desigualdades que existen no ámbito deportivo”.
 
Genma Otero, xerente de Augas de Ames, destaca que “o patrocinio supón, en definitiva, unha colaboración que vai máis alá do apoio económico a un equipo deportivo, ao permitir promover o deporte feminino, visibilizar o compromiso coa igualdade, fomentar hábitos responsables no consumo da auga e contribuír á dinamización social e económica do municipio de Ames”.