Os nacionalistas consideran que a dispoñibilidade destes terreos é unha oportunidade para crear vivenda pública en Bertamiráns e recordan que, segundo os proxectos actuais, Ames só disporía de vivenda pública no Milladoiro. “Especialmente para a xente nova e as familias con ingresos medios é case imposible o acceso á vivenda polos prezos e porque a oferta dispoñible non cobre a demanda, isto implica que a mocidade non pode emanciparse, as familias teñen que marchar a outro municipio, aumenta a desigualdade no concello e o crecemento vólvese desequilibrado, explica a voceira Escarlata Pampín. “Non falamos de números, falamos de xente que traballa en Ames e non pode vivir aquí, de parellas que atrasan proxectos vitais, ou de familias que destinan unha parte excesiva do seu salario ao alugueiro, por iso é necesario cambiar o enfoque das políticas de vivenda: aumentar a oferta accesible, promover vivenda pública e garantir prezos asumibles, subliña.

No pleno de setembro de 2025 o concelleiro do BNG de Ames, Alexandre Espinosa, preguntáballe ao alcalde se ía persistir no seu erro de non convocar á persoa que realmente é delegada de persoal e que provocou a condena, Blas García contestáballe que a sentenza estaba recorrida e que el actuaba legalmente. A ratificación da condena por parte do Tribunal Superior de Xustiza pon de manifesto a mala práctica do alcalde que lle vai custar ao Concello 15.000 euros.