- Tematica
O curso 2018-19 do programa de envellecemento activo ‘Amessan’ chega ao seu fin este xoves, 4 de xullo. Para celebralo, realizarase unha festa na Casa da Cultura de Bertamiráns a partir das 19.00h, na que actuarán os grupos de panderetas de Bugallido, Trasmonte, Ameixenda e Lens. Tamén se realizará unha exposición con algunhas das pezas elaboradas polo alumnado dos obradoiros de manualidades. A esta festa están convidados os/as participantes deste programa, así como toda a veciñanza de Ames. O programa amessán consta dunha serie de obradoiros de distinta temática, dirixidos a persoas maiores de 60 anos.
Os e as participantes do programa Amessán despiden este curso cunha festa na que farán repaso de todo o feito ao longo dos últimos nove meses. O acto contará coas actuacións dos grupos de pandeireta de Ameixenda, Bugallido, Lens e Trasmonte, no que cada un deles tocará catro pezas propias, ademais de dúas comúns. Así, Ameixenda interpretará as pezas Xota e muiñeira de Pigarzos, Pasodoble de Gargamala, Canto de Carantoña e Punteada de Folgoso, e Muiñeira de Toutón.
Bugallido, pola súa banda, subirá ao escenario para tocar Danza e valse das Cortellas, Canto de Barilongo, Pateado da Ponte e Muiñeira do Canizo; mentres que Lens tocará Ribeirada de Lira, Canto e danza Painceiros, Aña de Xabazáns e muiñeira, e Xota de Liñares. O grupo de Trasmonte interpretará Canto e muiñeira de Reboredo, Xota e pasodoble de Berdeogas, Pandeiretada de Outes e Xota e pasodoble de Liñares. No tocante ás pezas conxuntas, os catro grupos tocarán a Foliada de Nadela e Muiñeira corrida de Carballo.
As persoas asistentes tamén poderán ver a exposición de pezas, instalada nas dependencias da Casa da Cultura, elaboradas nos obradoiros de manualidades. Así, varios alumnos e alumnas achegarán algunhas das pezas elaboradas durante o último curso nos talleres impartidos nos locais sociais de Agrón, Cruxeiras e Trasmonte. Por último, a festa rematará cun percorrido por algunhas das actividades organizadas ao abeiro do programa amessán durante o curso.
Programa Amessan
Este programa de envellecemento activo, destinado a persoas maiores de 60 anos, inclúe actividades de ximnasia terapéutica e de manualidades, así como obradoiros de música tradicional e de memoria. Estas actividades desenvólvense nas Casas de Cultura de Bertamiráns e do Milladoiro e nos locais sociais de Agrón, Ameixenda, Augapesada, Bugallido, Covas, Cruxeiras, Lens, Piñeiro, Tarroeira e Trasmonte.
Ligazóns:
El Correo Gallego: "Chega ao seu fin o programa Amessan dirixido aos maiores"
Compostela 24 horas: "Fin de curso para os participantes do programa Amessan"
