O campamento sénior Amessán 2026, dirixido a persoas de 60 anos en diante e  empadroadas en Ames, rematou o pasado mércores 29 de xullo. Na quinta edición do campamento participaron en total 106 persoas repartidas, como vén sendo habitual, en dous grupos: un no Milladoiro e outro en Bertamiráns.  

Ao longo do mes, leváronse a cabo diferentes actividades físicas e cognitivas para os nosos maiores, impartidas polos mesmos monitores que o programa Amessán. Deste xeito, realizaron andainas, actividades terapéuticas, exercicios de activación da memoria ou de cooperación, entre moitas outras actividades, que se desenvolveron como parte do programa Amessán, ampliando así a súa programación habitual ao verán. 

A concelleira de Benestar Social, Igualdade e Voluntariado, Uxía García, subliña “que o campamento sénior é un programa que funciona moi ben. O obxectivo é que os nosos maiores pasen un verán entretido visitando diferentes vilas e cidades galegas e tamén que continúen realizando diferentes actividades de envellecemento activo. Ademais, é unha forma de manter as sinerxias que se xeraron ao longo de todo o ano e que se manteñan tamén durante as vacacións para darlle continuidade de cara o novo curso do Amessán”.  

Complementando ás xornadas do día a día, os participantes do campamento puideron gozar de cinco saídas ao longo dos mércores do mes de xullo, visitando recoñecidos lugares e paisaxes da xeografía galega. Tódalas as excursións contaron con puntos de saída dende Bertamiráns, e outro dende O Milladoiro. 

A primeira das saídas foi o pasado 1 de xullo ata varios puntos da Costa da Morte. Nesta xornada, os nosos maiores puideron visitar o casco histórico e a zona portuaria da vila de Muros, o hórreo e praia de Carnota, a vila mariñeira de Cee e finalmente Fisterra, onde visitaron a zona do faro e gozaron das vistas que ofrece este emprazamento antes de arrancar de volta. 

A semana seguinte, o mércores 8, os campistas tomaron dirección ao sur do país, visitando a zona de Vigo. Deste xeito, os usuarios e usuarias do campamento desprazáronse ata Baiona, onde fixeron un paseo pola vila e coñeceron algúns dos espazos máis representativos da zona. Logo, movéronse ata Vigo para gozar da praia de Samil. 

A terceira das saídas, o mércores 15, foi ao emprazamento natural de Marcelle. Durante tres horas pola mañá, os campistas tiveron a oportunidade de facer unha visita completa a esta reserva na que puideron observar os animais que a habitan. Tras isto, a excursión tomou rumbo cara á cidade de Lugo. Ali, todos e todas gozaron da herdanza romana que achega a capital lucense. 

O mércores 23, a acción pasou á comarca de Ferrolterra. A excursión comezou cun paseo en lancha pola ría de Ferrol dunha hora de duración. Ao rematar, o grupo dirixiuse a Mugardos e puido gozar da beleza dunha das vilas mariñeiras galegas por excelencia, que combina unha grande tradición gastronómica e un forte patrimonio histórico. 

As saídas do campamento puxeron o ramo coa excursión, o pasado mércores 23 de xullo, á Comarca do Salnés e contorna de Pontevedra. A visita comezou cunha ruta en barco polas bateas do Grove, na que os campistas puideron degustar mexillóns e viño. Logo, houbo algo de tempo libre polo Grove antes de poñer dirección a Pontevedra. A excursión rematou na vila mariñeira de Combarro.