Pestanas principais

Ruta de Riamonte

Percorrido circular de 7 km e dificultade media, que permite coñecer o conxunto etnográfico dos muíños de Riamonte.

Comézase o percorrido na pequena aldea do Vilar. Seguindo os postes indicativos, ascéndese por un vello camiño ata chegar ao primeiro dos muíños, o chamado de Ortoño, e o único que queda á beira dereita do regato.

Unha vez cruzado o regato por unha pontella o camiño segue por un tramo de bosque de ribeira, entre freixos e ameneiros, que agochan os restos de varios muíños entre pozas e pequenas fervenzas que manteñen o seu encanto e son a testemuña dun glorioso pasado de tradicións, historia e cultura singular.

Os muíños de Riamontes moían todo o verán coas augas que se represaban no Pozo. Forman parte dunha forma de vida comunitaria, na que os veciños e as veciñas tiñan cadansúa obriga.

Tras pasar o Pozo a ruta continúa por pistas forestais en constante subida entre plantacións de eucaliptos, ata chegar ao punto máis alto do percorrido. Trátase do Miradoiro do Monte de San Marcos, situado a 343 metros de altitude. Dende aquí, pódese contemplar unha magnífica panorámica do val do río Sar (Val da Maía) e de toda a comarca. Uns 200 metros máis arriba atópanse as ruínas da Ermida de San Marcos e dunha torre de vixiancia posiblemente de época medieval.

O regreso á aldea faise en continuo descenso, alternando entre monte baixo de toxo e eucaliptal, rodeando a ladeira do Monte de San Marcos. Os últimos dous quilómetros volven achegarse preto do regato de Riamonte e do bosque de ribeira para rematar, despois de cruzar a ponte, no mesmo lugar onde principiou o camiño.

Folleto:

Ficha da ruta:

  • Sendeiro: circular
  • Distancia: 7 quilómetros
  • Duración estimada: 2.30 horas
  • Desnivel máximo: 260 metros
  • Altitude: de 90 a 350 metros
  • Dificultade: media
  • Cartografía: folla 94-IV Santiago (mapa topográfico nacional 1:25.000)

Partes do muíño:

  • Trabe
  • Moega
  • Espitella
  • Quenlla
  • Tinxidoira
  • Capa
  • Aliviadoiro
  • Cruz
  • Canle
  • Beo
  • Masa de varas
  • Mesa
  • Pás ou penas
  • Rodicio

Que levar?

Para que o paseo sexa cómodo, lembre levar:

  • Auga
  • Alimentos enerxéticos como chocolate e froitos secos
  • Calzado cómodo e forte
  • Pantalóns longos, para evitar as rabuñaduras
  • Cámara fotográfica
  • Prismáticos, para contemplar as panorámicas
  • Unha prenda de abrigo para cando refresque ou por se comeza a chuviscar