Actualidade
Xoves, 11 de maio de 2023
O Concello de Ames dispón de dúas Oficinas de Asistencia en Materia de Rexistro (OAMR), unha no Milladoiro e outra en Bertamiráns, nas que se pode rexistrar todo tipo de documentos dirixidos aos departamentos deste Concello a excepción de trámites urbanísticos. Está facultada para recoller escritos dirixidos a calquera órgano administrativo, xa sexa da Administración Xeral do Estado, Administración Autonómica ou Administración Local: Rexistro SIR. Ademais, existe unha terceira Oficina de Asistencia en Materia de Rexistro nas oficinas de Urbanismo na que se recolle documentación unicamente de carácter urbanístico.
Sábado, 24 de outubro de 2020
O concello de Ames continúa medrando pese á crise demográfica que afecta á maioría dos municipios galegos, rexistrando ata mediados deste ano 146 nacementos e situándose a súa poboación actualmente nos 32.337 habitantes, tendo en conta os datos provisionais que manexa o Concello a través do padrón municipal. Segundo os datos oficiais do Instituto Nacional de Estadística (INE), Ames contaba a 1 de xaneiro de 2019 cun total de 31.793 habitantes (15.236 homes e 16.557 mulleres), o que supón que se sumou case 544 habitantes máis. Fronte á baixada de poboación rexistrada en Galicia que amosan os datos do INE, Ames mantén a tendencia das últimas dúas décadas e segue medrando e sumando habitantes ano a ano.
Martes, 23 de xuño de 2020
228 persoas solicitaron permiso para facer a cacharela esta noite de San Xoán en Ames. O lume arderá só en terreos e fincas particulares. A pandemia da Covid-19 limita este ano a realización das fogueiras e sardiñadas ao ámbito privado. As fogueiras deberán estar debidamente separadas de vivendas, árbores, tendidos eléctricos e vehículos. Ademais, as persoas responsables de cada lumieira deberán vixiar o lume até a total extinción do mesmo e ter a man os teléfonos da Policía Local, Protección Civil e Emerxencias. Co gallo de priorizar a seguridade e a protección da saúde pública, recoméndase asemade que as xuntanzas non superen as 25 persoas. O Concello insiste na necesidade de respectar a distancia interpersoal de metro e medio e no uso das máscaras cando non se cumpra esta medida.
Martes, 09 de xuño de 2020
O Concello de Ames abre o prazo para solicitar permiso para realizar cacharelas na noite de San Xoán. Este ano, debido á propagación da pandemia da Covid-19, non están permitidas as cacharelas ou sardiñadas en terreos públicos, e soamente será posible realizar cacharelas en terreos privados. O prazo para solicitar permiso está aberto ata ás 14:00 horas do luns 22 de xuño.