O Concello de Ames, a través do seu departamento de Xuventude, organiza unha nova edición do curso de monitor de tempo libre, dirixido a mozos e mozas maiores de 18 anos que queiran obter esta titulación. A formación terá unha duración de catro meses, desenvolvéndose entre os meses de febreiro e maio. As clases impartiranse no Pazo da Peregrina, en Bertamiráns, en horario de 9.00 a 14.00 e de 15.30 a 20.30 horas os sábados e domingos. O prazo de inscrición abre este martes 7 e estará aberto ata o 24 de xaneiro. O prezo do curso é de 172 euros. Ofértanse un máximo de 25 prazas que se cubriran por orde de inscrición. Pódese descargar a ficha de inscrición na seguinte ligazón. A inscrición pode facerse de maneira presencial nos rexistros municipais a través da Sede Electrónica.

O departamento de Xuventude organizou para este mes de novembro unha nova actividade para a mocidade amesá e para as familias e persoas en xeral con perfís profesionais educativos ou do tempo libre. Desta volta, vai impartir un curso de formación en comunicación non violenta denominado Falarnos Bonito, que se vai desenvolver o sábado 30 de novembro, de 11.00 a 13.00 horas, no Pazo da Peregrina. Trátase dunha actividade que é de balde, pero para participar hai que inscribirse enviando ata o 27 de novembro o impreso de inscrición ao enderezo xuventude@concellodeames.gal.

A Casa da Cultura do Milladoiro acolle este sábado, 23 de novembro, ás 19:00 horas, a gala de entrega de premios do V Certame Galetiktokers, unha iniciativa dos departamentos de Xuventude e de Normalización Lingüística do Concello de Ames, que se realiza por quinto ano consecutivo e que ten como obxectivo fomentar a creatividade da rapazada e animar a creación de vídeos en galego a través das redes sociais e das novas canles de comunicación. Nesta quinta edición presentáronse 39 vídeos, realizados por arredor de 80 mozos/as de Ames e doutras localidades de Galicia. O evento estará presentado e dirixido polas/os creadoras/es de contido en galego, @konachadas e @rodrimiguez97 , e amenizado polo rapeiro amesán Big Meu. A gala é aberta ao público e para reservar praza cómpre confirmar asistencia enviando un correo electrónico ao enderezo: galetiktokers24@gmail.com.  

O Concello de Ames, a través da Concellaría de Mocidade e a Xuntanza de Empresarios de Ames (XEA), organiza a segunda edición da Xincana Xove “Percorrendo Ames 2024”. Tratase dunha iniciativa composta por diversas probas para que a mocidade explore o concello e o coñeza de xeito participativo e divertido. O acto de presentación tivo lugar esta mañá na Casa do Concello. A actividade está dirixida a mozos e mozas entre os 14 e os 30 anos de calquera concello de Galicia, que deberán competir en equipo de tres mozos/as. As inscricións poderán facerse a través deste formulario web.