O Concello de Ames vai celebrar a vindeira fin de semana, o 23 e 24 de novembro, no campo da festa da parroquia de Trasmonte, a cuarta edición da Feira do Monte “Tanto Monte, Monte Tanto”. O obxectivo é poñer en valor o monte galego e recuperar os oficios ligados ao monte a través dun escaparate excepcional dos oficios e os produtos vinculados ao monte. Na actualidade cóntase con 25 expositores confirmados de Ames e diversas localidades de Galicia. Haberá unha carpa para estar a cuberto e poder participar nas actividades programadas. Durante toda a xornada non faltarán as tradicionais castañas asadas e maila música tradicional. Premendo nesta ligazón pódese consultar o programa completo da Feira.

O Concello de Ames, a través da Aula da Natureza, organiza este outono as xornadas “Arredor dos castiñeiros”, que se desenvolverán nos meses de setembro, outubro e novembro. Serán catro sesións centradas nos castiñeiros que contarán con charlas, obradoiros participativos e visitas a empresas de transformación de castaña. A segunda destas xornadas tivo lugar o pasado sábado: unha visita á empresa Naiciña, especializada na elaboración, transformación e distribución da castaña na que participaron 25 persoas. A visita estivo guiada por Miguel Ángel Areán, director-xerente da empresa.

O Concello de Ames está traballando na creación dunha asociación matriz, que xestione as diferentes comunidades enerxéticas que se poidan crear. Dita asociación estará formada polo Concello e por veciños e veciñas que aposten por formas de autoconsumo colectivo no que os participantes se benefician da enerxía que producen. Xa se celebraron varias xuntanzas nas que participou veciñanza de Lens, Trasmonte, Aldea Nova, Augapesada e Raíces. Está previsto facer reunións en todas as parroquias para explicar as funcións da Oficina de Transformación Comunitaria, que ofrece información, asesoría e acompañamento a todos aqueles axentes que desexen participar na comunidade enerxética local.

A Aula da Natureza, dentro da súa programación de outono, organizou tres obradoiros denominados “Doce Outono”, para promover o aproveitamento sostible dos alimentos. Estas actividades, que estiveron dirixidas a nenos/as e adultos, organizáronse os días 21 e 28 de setembro e mailo 5 de outubro. Deste xeito, hoxe impartiuse o último deste obradoiros no que os participantes aprenderon a elaborar marmeladas, confituras e chutneys. Nestas tres sesións participaron un total de 65 persoas, completando todas as prazas ofertadas.