Dende hoxe, venres 3, e ata o 20 de maio está aberto o prazo de inscrición para participar na Escola de Verán, unha oferta educativa e de ocio concibida para conciliar a vida laboral e familiar da veciñanza de Ames durante o período non lectivo dos meses de xullo e agosto. O servizo está dirixido aos nenos e nenas escolarizados no segundo ciclo de Educación Infantil e en Educación Primaria. O programa impartirase no CEIP da Maía, en Bertamiráns, e na EEI do Milladoiro e CEP de Ventín, no Milladoiro. O programa ten un horario de 7:30 a 16:00 horas, e inclúe os servizos de comedores e Bos Días. As persoas interesadas deben entregar a documentación necesaria na Sede electrónica do Concello de Ames ou nas oficinas de asistencia en materia de rexistro do Concello de Ames (O Milladoiro e Bertamiráns). Premendo esta ligazón pódese obter os impresos de inscrición da Escola de Verán 2024. As solicitudes presentadas fóra de prazo irán a unha listaxe de agarda.

Esta mañá, o salón de plenos da Casa do Concello, en Bertamiráns, recibiu a visita do alumnado de cuarto curso de educación primaria do CEIP Agro do Muíño, que se achegou á Casa consistorial para coñecer de primeira man o traballo que se realiza neste lugar. Así, acompañados de varios membros do Goberno local e dos grupos municipais do Partido Popular e do BNG, arredor de 75 nenos e nenas aprenderon que é un pleno municipal, o traballo que realizan os edís municipais e as funcións que cumpre a Administración local. Ademais, a rapazada puido trasladar aos membros da Corporación as súas dúbidas e preguntas.

O Concello de Ames, a través da Concellaría de Promoción Económica e innovación, elaborou un vídeo resumen do Roteiro Maker co obxectivo de dar a coñecer esta iniciativa na Red Innpulso. O Roteiro Maker, unha furgoneta que organiza obradoiros itinerantes gratuítos relacionados coa ciencia e a tecnoloxía, visitou os colexios de Agro do Muíño, A Maía, Barouta e Ventín entre o 20 e o 23 de febreiro para conmemorar o Día da Muller e a Nena na Ciencia. Nesta iniciativa participaron arredor de 400 alumnos e alumnas de educación infantil e primaria. Con esta iniciativa o Concello de Ames busca dar a coñecer a figura das mulleres en diversas áreas científicas.

Este luns, 25 de marzo, deu comezo unha nova edición da Primavera Lúdica, na que están a participar 105 nenos e nenas. A finalidade deste programa, que se desenvolve no CEIP da Maía e no CEP de Ventín, é facilitar a conciliación das familias amesás durante as vacación escolares de Semana Santa. As actividades, impartidas de 7.30 á 16.00 horas cos servizos de Bos Días e comedor incluídos, continuarán até o luns 1 de abril. Nesta edición, baixo o nome “Aventuras zumbantes!”, o programa céntrase nas abellas e no fundamental labor que realizan para a conservación da biodiversidade e do equilibrio do medio natural.