Actualidade

Ex., 25-06-2019
Ex., 25-06-2019
Martes, 25 de xuño de 2019
Cartel concerto Milladoiro en Bugallido

San Pedro de Bugallido celebra esta fin de semana as súas festas patronais, que constarán de tres días de festa e música. Nun cartel copado polas actuacións de orquestras como Gran Parada e Ibiza, o evento central da festividade será o concerto do grupo folk Milladoiro, que actuará no campo da festa de Bugallido o sábado, 29 de xuño, a partir das 23.00 horas. Durante a súa actuación, os seis membros deste destacado grupo farán un percorrido polos doce temas que compoñen Atlántico, o seu último traballo.

Martes, 25 de xuño de 2019
Curso primeiros auxilios OMIX 2019

Un total de vinte persoas participaron na última edición do curso de primeiros auxilios organizado pola Oficina Municipal de Información Xuvenil (OMIX) de Ames, dependente da Concellaría de Mocidade. O obxectivo desta formación, que o alumnado valorou de maneira moi positiva, foi o de ofrecerlles aos participantes unha serie de ferramentas e coñecementos que lles permitan actuar ante un accidente doméstico, viario ou unha situación de emerxencia ata a chegada dos servizos sanitarios. O curso desenvolveuse os luns, martes e mércores do 3 ao 19 de xuño.

Martes, 25 de xuño de 2019
Millaraio no Campionato de España por equipos

Este sábado, 22 de xuño, desenvolveuse en Lugo o Campionato de Galicia sub14 en Pista ao aire libre. No evento deportivo, que constou de 18 probas, participaron os e as atletas inscritas coas dezaseis mellores marcas da tempada actual. O campionato contou coa participación de nove atletas do Millaraio, entre os que destacaron Alejandro Jiménez, que se proclamou campión masculino nos 80 metros e subcampión do salto de lonxitude, Noel Ferraces, que acadou a cuarta posición no salto de altura, e Antía Figueiras, cun quinto posto nesta mesma proba.

Sábado, 22 de xuño de 2019
Cartel parcial festas San Xoán de Ortoño

San Xoán de Ortoño celebra as festas en honor ao seu patrón do domingo 23 ao martes 25 deste mes. O cartel constará de tres días de festa cargados de música, agrupacións folclóricas e actuacións estelares. Asemade, o domingo  ás 21.00 horas terá lugar a tradicional sardiñada de San Xoán, que será amenizada polo dúo Rosan. A Pulpería Lito Mambís encargarase do aspecto gastronómico durante os tres días de festexos.

Sábado, 22 de xuño de 2019
Comedor do CEIP Agro do Muíño

As nenas e nenos usuarias da Rede Municipal de Comedores Escolares celebraron este xoves 20 de xuño, penúltimo día de clase, o fin de curso cun xantar moi especial: churrasco con patacas fritas e, de sobremesa, xeado de xeo. O menú foi escollido polos propios rapaces e rapazas, nunhas eleccións organizadas, como noutros anos, polo propio Concello. As eleccións desenvolvéronse durante o horario no que se emprega o servizo de comedores no CEIP Agro do Muíño, CEIP A Maía, CEP de Ventín, CEIP de Barouta e na EEI do Milladoiro. O primeiro prato, ensalada mixta, foi escollido pola nutricionista municipal.

Venres, 21 de xuño de 2019
Presentación proxecto botanico especies arboreas Bertamiráns

O alumnado de 1º, 3º e 4º da ESO do IES de Ames presentou esta mañá os froitos do seu proxecto de interpretación botánica dos parques e xardíns de Bertamiráns, no que colaboraron coa Aula da Natureza e a OMIX. Durante a presentación, as técnicas municipais da Aula da Natureza e da OMIX de Ames e os profesores e alumnos que participaron no proxecto explicaron o traballo realizado ao longo do curso 2018/19 ao abeiro desta iniciativa. O traballo culmina na creación dunha guía de campo das especies arbóreas de Bertamiráns, a colocación de 55 placas identificadoras en parques e xardíns da localidade, e a instalación dun mural de 62 metros lineais no paseo fluvial de Bertamiráns.

Venres, 21 de xuño de 2019
Presentación da cuarta edición do DeporCampus

Esta mañá presentouse a cuarta edición do Depor Campus de fútbol de Bertamiráns. A presentación, que tivo lugar no salón de plenos da Casa do Concello, correu a cargo do alcalde, José Miñones, da concelleira de Deportes, Susana Señorís, o director dos Depor Campus, Pablo Barros, o secretario técnico de fútbol base do Bertamiráns FC, Sergio Penas, e o presidente do Bertamiráns FC, Rafael Budiño. O Depor Campus, que está dirixido a nenos e nenas de 6 a 14 anos, desenvolveranse entre os días 8 e 12 de xullo no campo de fútbol municipal de Bertamiráns. As inscricións poderanse realizar ata o 4 de xullo.

Venres, 21 de xuño de 2019
Cartel dos cursos de infórmática da OMIX

A Concellaría de Mocidade, a través da Oficina municipal de información xuvenil, organiza de cara ao mes de xullo dous cursos na Aula de informática do Milladoiro. O curso de emprendemento e busca de emprego na rede, aplicacións e redes sociais de utilidade, currículo vitae e vídeo-currículo, impartirase do 9 ao 12 de xullo, en horario de 10.00 a 13.00 horas. O segundo curso de community manager para emprender, marketing dixital, marca persoal e xestión do tempo, desenvolverase do 16 ao 19 de xullo, tamén de 10.00 a 13.00 horas. Para participar nestas actividades terán preferencia os/as mozos/as de 15 a 30 anos. O prazo de inscrición remata o 3 de xullo. Ao pé desta nova podes decargar a ficha de inscrición para os obradoiros de emprendemento da OMIX.

Xoves, 20 de xuño de 2019
Imaxe da Casa do Concello

Co gallo do Día Internacional da ELA, a Casa do Concello de Ames iluminarase de verde a noite deste venres, 21 de xullo, como apoio á iniciativa #LuzporlaELA. O obxectivo desta iniciativa, impulsada pola Fundación Luzón e as Asociacións de Familiares e Pacientes de ELA de España, é darlle visibilidade a esta enfermidade dexenerativa, ao tempo que se mostra o apoio e solidariedade coas máis de 4.000 persoas afectadas pola ELA en España. Ao abeiro deste proxecto, este venres ilumínanse un total de 192 monumentos repartidos por 129 cidades españolas.

Xoves, 20 de xuño de 2019
Cartel do concerto de fin de curso da EMMA

Este venres, 21 de xuño, remata o curso lectivo 2018/19. En Ames esta despedida das aulas ven acompañada polo tradicional concerto de fin de curso do alumnado da Escola Municipal de Música de Ames, que este ano conta cun repertorio no que ten cabida un amplo abano de formatos e estilos. Esta actuación ten lugar a partir das 19.30 horas na Casa da Cultura de Bertamiráns, e está aberta a toda a veciñanza.