Xuventude Ames oferta este curso útil que abre moitas portas de cara á inserción laboral e que capacita para deseñar, programar e pór en práctica actividades para o tempo libre, orientadas á infancia, á mocidade o incluso a persoas maiores ou con necesidades especiais. No curso abordaranse cuestións psicolóxicas, dinámicas de grupo, xogos, educación ambiental e demais temáticas relacionadas coa animación sociocultural.

A formación consta de dúas partes: a primeira, teórico-práctica, durará 200 horas divididas en 40 hora en liña e 160 presenciais durante as fins de semana, a razón de 10 horas diarias en horario de 9.00 a 14.00 horas e de 15.30 a 20.30 horas; a segunda serán 150 horas totalmente prácticas, onde o alumnado deberá buscar unha institución onde poder elaborar o proxecto desta fase. 

Proceso de inscrición
O prazo de inscrición estará aberto do 9 ao 21 de xaneiro. Para poder anotarse, todas aquelas persoas interesadas deberán dirixirse á Sede electrónica do Concello de Ames e entregar cuberta a ficha de inscrición, unha fotocopia do DNI e unha fotocopia da titulación académica que se posúa no momento de formalizar a solicitude. 

As prazas do curso son limitadas e as solicitudes seguirán unha rigorosa orde de chegada, polo que se recomenda formalizala canto antes. Tamén se poderá realizar a inscrición de maneira presencial nos rexistros municipais do Milladoiro e Bertamiráns. 

Pódese obter máis información no número de teléfono 616 083 229 ou no enderezo de correo electrónico xuventude@concellodeames.gal. 

Novas relacionadas

El Correo Gallego: "Ames oferta un curso de monitor de actividades de tiempo libre"