Lorenzana mantivo esta mañá en Santiago unha reunión de traballo co alcalde de Ames, Blas García, co obxectivo de abordar as necesidades de desenvolvemento de solo empresarial no municipio coruñés e máis en concreto, as posibilidades de crecemento do actual polígono industrial de Bertamiráns. 

Neste senso, a conselleira de Economía e Industria destacou o emprazamento privilexiado do futuro parque empresarial ao conectar esa zona coa estrada da Costa da Morte, a Autovía Santiago-Noia e a autoestrada AP-9. Pola súa banda, o rexedor amesán agradeceulle á conselleira o interese e a vontade por facer que Ames siga medrando: “O ritmo de crecemento de Ames fai necesario habilitar solo industrial e empresarial para xerar oportunidades de emprego na zona e, dende esta administración, traballaremos man a man coa Xunta coa máxima lealdade e respecto como vimos facendo durante todo este mandato”

Ames conta co distintivo de Concello Emprendedor, sumándose así ao obxectivo da Xunta de poñer facilidades ao investimento empresarial para impulsar a reactivación económica e, polo tanto, ofrecer máis axilidade na tramitación administrativa, no acceso ao solo industrial e maiores incentivos fiscais.