O proceso de tramitación da nova escola infantil de Bertamiráns está a piques de finalizar. A Xunta de Goberno Local acaba de conceder a licencia de construción para que a Xunta de Galicia poida comezar coas obras de execución desta nova infraestrutura. Nos vindeiros días o Concello de Ames notificaralle ao Consorcio Galego de Igualdade e Benestar que xa dispón da licencia de construción para poder comezar coas obras.

Esta infraestrutura estará situada na rúa do Muíño, que se atopa preto do paseo fluvial de Bertamiráns. O importe de execución desta obra ascende a contía de 735.198,54 euros. Segundo se establece no convenio de construción da escola infantil, o Consorcio achegará o 60% do seu custo total e o Concello o 40%.

No proxecto básico de execución detállase que a nova escola infantil está deseñada en planta baixa. Disporá de dúas zonas diferenciadas que estarán unidas a través dun vestíbulo, que servirá de zona de xogos e de enlace entre as dúas zonas. Na zona sur estarán situadas as 6 aulas das que disporá esta escola, mentres na zona norte haberá unha sala de usos múltiples; unha zona de servizos con cociña, vestiarios e aseos; unha sala de profesores/as; e un despacho para a dirección do centro.

82 prazas para nenos/as de 0 a 3 anos
A nova escola infantil de Bertamiráns contará cun total de 82 prazas para nenos e nenas de 0 a 3 anos, distribuídas en 6 unidades, o que permitirá elevar a oferta ata as 184 prazas na rede A Galiña Azul do concello e, polo tanto, suporá un incremento do 80 por cento con respecto ás que existen actualmente. Haberá 2 aulas para nenos/as e 0 a 1 anos, 2 aulas para nenos/as de 1 a 2 anos; e outras 2 aulas para nenos/as de 2 a 3 anos. As aulas do alumnado de 0 a 1 anos teñen unha superficie de 22 metros cadrados; as unidades de 1 a 2 anos ocupan 30 metros cadrados; e as aulas de 2 a 3 anos teñen unhas dimensións de 36 metros cadrados.

Esta infraestrutura estará situada nunha parcela de 3.389 metros cadrados. A superficie construída da escola é de 514,70 metros cadrados, mentres que a superficie ocupada polos porches ascende a 107,75 metros cadrados. Cómpre destacar que o Concello solicitaralle ao Consorcio Galego de Igualdade e Benestar que a superficie sobrante da parcela cedida para a construción desta infraestrutura reverta outra ven no Concello. Deste xeito, os metros sobrantes poderanse empregar para a construcións doutras infraestruturas municipais que sexan de utilidade para a veciñanza amiense.

Sinatura do convenio
No pasado mes de xaneiro o alcalde de Ames, Santiago Amor, e a conselleira de Traballo e Benestar, Beatriz Mato, asinaron un convenio para a construción en Bertamiráns desta segunda escola infantil. A sinatura deste convenio foi aprobada polo Pleno de Ames en decembro de 2013 coa introdución dun voto particular acordado por toda a corporación municipal. Este texto recolle que a xestión da escola será pública, que contará cun mínimo de 6 unidades e 82 prazas, que o máximo anual correspondente ao Concello non poderá ser modificado unilateralmente polo Consorcio.

O alcalde de Ames, Santiago Amor, explicou que “a Xunta de Goberno Local acaba de aprobar a concesión da licenza de construción da nova escola infantil de Bertamiráns, polo que se dá vía libre para comezar as obras de execución”. O rexedor municipal tamén destacou “que se trata dunha infraestrutura moi importante para Ames, xa que permitirá que Bertamiráns conte cunha segunda escola infantil que virá a cubrir as necesidades da cidadanía deste núcleo. Ames ten unhas características moi particulares e está en constate crecemento. O pasado ano superamos os 30.000 habitantes e producíronse máis de 340 nacementos”.

Contido relacionado

El Correo Gallego: "Ames notificará á Xunta a licenza para crear a escola infantil de Bertamiráns"
La Voz de Galicia: "El Concello concede la licencia de la segunda guardería de Bertamiráns"