- Tematica
O XIII Festival Peregrinos Musicales ultima xa todos os preparativos para a súa posta en marcha. Unha das actividades centrais das dúas semanas de intenso programa será o tradicional concerto da Real Filharmonía de Galicia. A cita terá lugar o martes 11 de xullo, no Auditorio de Galicia, ás 20:30 horas, e contará coa participación dos seis intérpretes galardoados no Certame Internacional de Novos Talentos Peregrinos Musicales. As outras sete xornadas musicais que ofrecerá o festival desenvolveranse entre o 29 de xuño e o 14 de xullo. Este ano, como novidade, ademais de ter lugar en espazos emblemáticos de Santiago de Compostela, algúns concertos desenvolveranse tamén no Pazo da Peregrina de Bertamiráns.
No evento musical participará, ademais da Real Filharmonía de Galicia, un elenco de participantes moi variado e repleto de talento, o dos seis galardoados no Certame Internacional de Novos Talentos Peregrinos Musicales. Entre eles, atópanse dous galegos, os pianistas Cristina Bernal (Culleredo) e Yuri Durán (A Pobra do Caramiñal). Acompañaranos os vascos Pablo López (clarinete) e Nerea Arriola (violín), así como o alemán Emanuel Sint (fagot) e a ucraína Sonya Zholoboba (piano). O acceso será de balde.
Os seis músicos terán a oportunidade, como gañadores do concurso asociado, de actuar como solistas coa Real Filharmonía, baixo a dirección de Maximino Zumalave. Esta formación leva colaborando co Festival Peregrinos Musicales desde os seus inicios, ofrecendo a posibilidade a intérpretes de ata 24 anos de protagonizar un concerto ante un público diferente e con profesionais da altura dos integrantes da RFG.
O programa desta xornada musical ofrecerá pezas de grandes compositores da música clásica nunha sesión de preto de hora e media de música, o que suporá unha oportunidade para achegarse a este xénero musical da man de grandes profesionais e de futuras promesas internacionais do sector.
Premendo nesta ligazón podes consultar o programa previsto para o concerto.
Ao finalizar as actuacións musicais, procederase á entrega dos premios do festival: o Gran Prix do público (que, coas súas votacións en liña, escollerán ao/á mellor intérprete entre os seis galardoados) e o Premio de concerto con caché da Asociación Peregrinos Musicales.
Sete xornadas musicais en Ames e Santiago de Compostela
O Festival Peregrinos Musicales ofrecerá un total de sete xornadas musicais, ademais da do concerto da Real Filharmonía Galega. Desenvolverase entre o 29 de xuño e o 14 de xullo, fundamentalmente en espazos emblemáticos de Santiago de Compostela. Este ano, como novidade, Ames converterase nun dos epicentros do festival, e algunhas das citas musicais terán lugar no Pazo da Peregrina, en Bertamiráns. Deste xeito, a veciñanza amesá poderá gozar da música clásica a través de concertos de artistas consagrados e de novos intérpretes internacionais.
