O Concello de Ames abre o prazo para solicitar o uso dos pavillóns polideportivos municipais. As solicitudes poderán presentarse entre o 12 e o 23 de setembro de 2011 no rexistro municipal. As horas de uso destas instalacións asignaranse por orde de entrada das solicitudes no rexistro municipal. As solicitudes e a concesión destas axustaranse á ordenanza municipal correspondente e ás Normas de Uso das Instalacións Deportivas Municipais vixentes. Poderá haber suspensións puntuais segundo as necesidades da programación do Concello, pois esta terá sempre prioridade.

Todas as persoas interesadas deben saber que as instalacións ofertadas son os pavillóns polideportivos de Bertamiráns e do Milladoiro. O horario e os días ofertados para o pavillón polideportivo de Bertamiráns vai dende as 22:30 ata as 23:30 horas dos luns, mércores e venres. Mentres que no pavillón polideportivo do Milladoiro ofértase entre as 21:30 ás 22:30 horas dos luns e dos mércores.

Estas instalacións poderán empregarse durante o período comprendido entre o 3 de outubro de 2011 e o 30 de xuño de 2012. Para obter máis información poden pasar pola Oficina de Cultura e Deportes de Bertamiráns, situada no Pazo da Peregrina, de luns a venres entre as 9:00 e as 14:00 horas, ou poden chamar ao número de teléfono 981 884 991.