O Concello de Ames, a través da Concellaría de Deportes e Promoción da Saúde, organizou unha nova actividade dentro do programa municipal Andainas Saudables. O pasado sábado, 27 de abril, setenta persoas realizaron a segunda etapa do Camiño de Santiago dende o Barbanza “A orixe” ao percorrer os 15 quilómetros que separan a praia do Vilar de Ribeira. Os participantes comezaron a ruta na praia do Vilar cara a Capela da Guía, pasando polos muíños do río Amendo. Dende alí dirixíronse ao lugar de Montevixán para adentrarse no Parque Natural, onde os participantes puideron contemplar a Lagoa de Vixán. A continuación a ruta levounos á aldea da Graña, pasando polo miradoiro dos Castelos lugar dende o que puideron contemplar unha fermosa panorámica da ría de Arousa, a illa de Sálvora ou a enseada de Corrubedo. A continuación, a ruta levounos ata o porto de Aguiño onde iniciaron un tramo á do beira mar, pasando polas praias de Castro e Castiñeiras e comezaron o ascenso ao monte de Martín. Unha vez no cumio iniciaron descenso cara a praia de Touro, percorrendo parte do paseo marítimo ata chegaren ao casco urbano e remataren na Praza Porta do Sol, onde se encontra a Igrexa de Santa Uxía de Ribeira.

Esta andaina dálle continuidade ao Camiño iniciado no mes de marzo no que setenta persoas percorreron a primeira etapa do Camiño de Santiago dende O Barbanza “A orixe” que discorre entre o Faro de Corrubedo e a praia do Vilar. “A orixe” é un Camiño de 120 quilómetros que parte dende o Faro de Corrubedo e pasa por diversos lugares da ría de Arousa, atravesando cidades e pobos costeiros como Ribeira, A Pobra do Caramiñal, Boiro e Rianxo ata enlazar co Camiño Portugués ao chegar a Padrón.

A seguinte andaina saudable terá lugar o 27 de maio, xornada na que os participantes realicen a terceira etapa do Camiño de Santiago dende O Barbanza “A orixe” ao percorrer os 15 quilómetros que separan a localidade de Ribeira da Pobra do Caramiñal.