Coa presenza desta unidade móbil de doazón, e baixo o lema “Doa sangue, o mellor regalo”, a Axencia de Doazón de Órganos e Sangue (ADOS) subministra compoñentes sanguíneos a todos os hospitais de Galicia. Cada día, as doazóns de sangue recollidas nos locais de doazón e nas 10 unidades móbiles que percorren os concellos galegos envíanse ás dependencias de ADOS para o seu procesamento, análise e distribución.

Cada día os hospitais galegos precisan entre 400 e 500 doazóns de sangue para manter a súa actividade. Por iso, dende o Concello de Ames, anímase á veciñanza a acudir a esta unidade móbil de doazón, que estará no novo centro de saúde do Milladoiro o mércores 28 de 15.30 a 21.00 horas e na Praza de Chavián de Bertamiráns o día 30 de 9.30 a 14.30 horas e de 15.30 a 21.00 horas, e o día 31 de 10.00 a 15.00 horas. 

Tan só é necesario 15 minutos do teu tempo
O sangue non se pode fabricar e só é posible obtelo coa doazón de persoas solidarias que axudan a outras a recuperar a saúde. Grazas ás persoas que doan sangue axúdase a preto de 31.000 persoas enfermas nos hospitais galegos cada ano. Busca 15 minutos do teu tempo para doar sangue e salvar a vida de moitas persoas.

Na situación actual, a Axencia Galega de Doazón de Órganos e Sangue traballa cun protocolo que garante a seguridade do persoal sanitario e dos doadores de sangue. Así mesmo, dispón dun teléfono de información gratuíto para consultar as dúbidas sobre a doazón de sangue e tamén sobre a localización das unidades móbiles da doazón de sangue, o número 900 100 828. Tamén se pode consultar a súa páxina web premendo nesta ligazón.