As maiores dificultades coas que se atopa Sabine Leopold na biblioteca do Milladoiro teñen que ver co idioma. Iso non lle impide colaborar na ordenación de fondos e, en ocasións, atender o servizo de préstamos, sempre supervisada polos técnicos das bibliotecas municipais de Ames. Ademais desta axuda, Sabine recibe periodicamente a visita dun titor da Fundación Paideia e dun tradutor. Algúns usuarios e usuarias da biblioteca que falan alemán axudan tamén á Sabine na súa integración e no desenvolvemento das súas funcións como traballadora en prácticas.

Sabine forma parte dun grupo de 9 mozos e mozas, orixinarios de Cottbus, que a través do proxecto “La Ida” realizan actividades formativas en empresas que favorecen o seu axuste persoal e contribúen ao desenvolvemento das súas capacidades a través de distintas actividades coordinadas pola fundación Paideia. A moza estará en Ames ata o 11 de outubro. Ademais dos seus labores como auxiliar de biblioteca, a xove alemá ten a obriga de afondar na cultura do país de acollida a través do estudo de un dos seus autores. Sabine elixiu a Rosalía de Castro e para a realización do traballo sobre a autora de “En las orillas del Sar” está sendo axudada tanto polo seu titor e o seu tradutor como polos técnicos das Bibliotecas de Ames e por algúns usuarios e usuarias que dominan o idioma alemá.

A fundación Paideia Galiza é socio de “La Ida”, un proxecto do Ministerio Federal de Traballo e Asuntos Sociais que ten por obxecto organizar estancias transnacionais e que da a oportunidade a estes mozos e mozas de saír da súa contorna e desenvolver habilidades personais, sociais e técnicas, ademais de ofrecerlles a posibilidade de adquirir coñecementos lingüísticos e mellorar as súas capacidades de formación e ocupación.

Como empresa colaboradora, o Concello de Ames comprometeuse coa Fundación Paideia o cumprimento dunha programación de actividades, previamente acordada, e a realizar o seguimento e a valoración do proceso de prácticas da participante e, xunto cos titores designados pola Fundación e polo proxecto “La Ida”, e a revisar a programación unha vez iniciada a estadia formativa e á vista dos resultados e da evolución da participante.

Sabine, como o resto dos seus compañeiros e compañeiras de proxecto, dispón dun documento de seguimento e de avaliación das actividades realizadas que supervisa o técnico das Bibliotecas de Ames, Santi Eiris, como responsable da empresa colaboradora e os titores da moza designados pola fundación Paidea e polo proxecto “La Ida”. Neste documento figurarán as actividades máis significativas realizadas no transcurso das súas prácticas. Este documento lle servirá, sen dúbida, a Sabine, como pasaporte para atopar unha mellor situación laboral unha vez que regrese ao seu país.