A través desta liña de axudas, a Concellaría de Benestar Social busca apoiar a este tipo de familias, fixando ao mesmo tempo poboación no concello e potenciando un crecemento demográfico sostido no tempo. O obxectivo destas axudas é proporcionarlles apoio económico a aquelas familias cualificadas como numerosas pola Consellería de Traballo e Benestar da Xunta de Galicia, ou organismos análogos doutras comunidades autónomas.

Os beneficiarios/as destas axudas son aquelas familias numerosas que teñan a súa residencia habitual no municipio de Ames. Con este tipo de iniciativas, o Concello de Ames, a través da Concellería de Benestar Social, pretende axudar a aquelas familias que máis dificultades teñen para a crianza dos fillos; aínda que estas axudas non son exclusivas, singulariza a Ames entre os municipios da área.

Para iso a Xunta de Goberno Local acaba de aprobar a concesión da primeira remesa destas axudas económicas tramitadas no ano 2020, que consisten no pagamento único de 1.200 euros por unidade de convivencia. Neste caso, concédese o reparto de 73.200 euros entre 61 familias.

Ademais, denegóuselle esta axuda a 39 familias por diversos motivos recollidos nas bases de dita convocatoria de axudas e solicitóuselle documentación a 22 unidades de convivencia para que a acheguen co obxecto de poder aprobarlle tamén esta axuda unha vez se comprobe a documentación achegada.

Por outro lado, non se admitiu a trámite a solicitude de dúas familias por extemporáneas, é dicir, presentadas fóra de prazo.

A concelleira de Servizos Sociais e Igualdade, Luísa Feijóo, destaca que “Ames ten uns segmentos de poboación moi variados e hai un número importante de familias para as que estas axudas son imprescindibles á hora de abordar os seus gastos correntes ou algún gasto extraordinario. Aínda que Ames é un concello novo e cun saldo vexetativo positivo importante, as familias numerosas xogan un papel importante á hora de reverter a situación demográfica xeral, polo que o Concello de Ames seguirá apostando por este tipo de axudas que, aínda que non teñen un importe moi elevado por familia, si considero que son necesarias xa que supoñen un apoio as súas economías”.

Novas relacionadas: 

La Voz de Galicia: " Ames reparte 73.000 euros entre 61 familias numerosas que viven en el municipio"

Composela 24 Horas: "Un total de 61 familias de Ames benefícianse das axudas municipais para familias numerosas"