Nesta actividade informativa, interviñeron o alcalde de Ames, Santiago Amor; a psicóloga clínica, técnica de prevención de drogodependencias dos concellos de Ames, Brión e Negreira, Sagrario Ferreira; a directora do Instituto de Ensinanza Secundaria de Ames, María Soledad Louro; a directora do CEIP A Maía, Rosalía Avilés, e o garda civil do Plan Director Convivencia Escolar, José Souto. Ao acto tamén asistiron a concelleira de Sanidade, Eugenia Martín, e a de Igualdade, María González.

Durante a clausura da xornada, o alcalde de Ames agradeceulles aos pais e nais a súa asistencia ao acto e asegurou que con estas iniciativas “o Concello quere trasladar a súa preocupación polo benestar das familias amienses e polos nosos mozos”. Santiago Amor subliñou que a transición de primaria a secundaria “implica novos e grandes retos”, polo que apostou por “ofrecer toda a información posible para saber como enfrontalos, como é o caso desta charla coa que se están poñendo unhas bases que vos permitirán saber como reaccionar”.

O obxectivo desta charla informativa, organizada pola Concellaría de Sanidade, era informar e sensibilizar os pais e nais para prever diferentes condutas de risco ou situacións problemáticas derivadas do paso da educación primaria á secundaria. A charla tenta abrir un marco de debate e reflexión sobre o papel da familia na socialización e educación dos fillos. Búscase promover unha maior implicación dos pais e nais ou titores como axentes de saúde e fomentar a adquisición das competencias necesarias para que poidan desenvolver esta importante función de forma axeitada.

A xornada tentou resolver todas as dúbidas e inquietudes dos pais, que adoitan ter preocupación polo cambio que supón o paso de educación primaria a secundaria, pasando dun centro de educación infantil e primaria a un instituto de ensinanza secundaria.