[13-08-2012] A iniciativa Setembro Lúdico, organizada polo Concello de Ames para ocupar o tempo de lecer que teñen os nenos e nenas dende o remate da Escola de Verán e o comezo do curso escolar, conta este ano con 187 rapaces e rapazas inscritos. Deste total, 113 participantes son do Milladoiro e 74 de Bertamiráns. Este programa de conciliación, dirixido aos rapaces e rapazas de Ames escolarizados no segundo ciclo de educación infantil e en educación primaria, desenvolverase os días 3, 4, 5, 6, 7, 10 e 11 de setembro.
Un ano máis, o Concello de Ames oferta unha alternativa para o tempo de lecer dos nenos e nenas amienses ademais dunha boa oportunidade para conciliar a vida laboral e familiar a través do programa Setembro Lúdico. O Setembro Lúdico iniciarase cada día ás 7:30 horas co programa Bos Días. Ás nove da mañá os nenos e nenas pasarán a desenvolver as actividades programadas ata as 14:30 horas. No caso de Bertamiráns, os nenos e nenas desenvolverán as actividades no CEIP A Maía, mentres que no Milladoiro as actividades terán lugar na escola infantil, situada na Travesía do Porto, e no pavillón polideportivo. Os nenos e nenas que non vaian usar o servizo de comedor serán recollidos/as antes desta hora. Os usuarios de comedor terán xogo libre e comedor ata as 16.00 horas.
A lista de admitidos/as na que se indicarán os lugares das actividades por grupos publicarase esta semana nos taboleiros de anuncios do Concello e da Oficina Municipal do Milladoiro. Para máis información poden chamar ao departamento de Educación marcando o número de teléfono 981 891 476 ou enviar un correo electrónico ao enderezo educacion@concellodeames.org.