[06-04-2018] Este sábado, 7 de abril, a Aula da Natureza organiza un paseo sensitivo polas fragas de Agrón. A actividade, que se presenta baixo o nome “Con-tacto Natural”, está dirixida a familias con nenas e nenos entre os 2 e os 7 anos. O obxectivo desta iniciativa é achegar ás mais cativas e cativos do concello á natureza a través dos sentidos. O paseo desenvolverase entre as 12:00h e as 13:30 horas. A actividade, que xa ten todas as prazas cubertas, contará con servizo de autobús desde O Milladoiro e Bertamiráns. O sábado 21 de abril, repetirase esta mesma actividade, para a cal aínda é posible inscribirse. A reserva de prazas pódese facer a través do número de teléfono 660 004 665 ou do enderezo de correo electrónico auladanatureza@concellodeames.gal.
A actividade “Con-tacto Natural”, organizada pola Aula da Natureza para este sábado, consistirá nun paseo sensitivo polas fragas de Agrón. O obxectivo desta actividade é o de achegar ás máis pequenas e pequenos á natureza, dun xeito sinxelo a través dos sentidos mediante, por exemplo, o tacto da terra ou o son da auga. Para isto, están preparados, ao longo de toda a fraga, unha serie de pequenos circuítos sensoriais adaptados ás crianzas.
Dirixida a familias con nenas e nenos entre os 2 e os 7 anos, a actividade será guiada por monitores especializados en explicar o medio natural ás máis pequenas e pequenos. Deste xeito, aínda que as explicacións correrán a cargo de guías da empresa CPM Eventos, as nais e os pais terán un papel fundamental no desenvolvemento da actividade, xa que serán os responsables de interactuar cos seus fillos nos descubrimentos que se vaian facendo.
A actividade repítese o sábado 21 de abril
Aínda que xa non quedan prazas dispoñibles para o paseo deste sábado, as persoas interesadas poderán asistir a esta actividade o vindeiro 21 de abril. A reserva de prazas pódese facer a través do número de teléfono 660 004 665 ou do enderezo de correo electrónico auladanatureza@concellodeames.gal. Ambos os días haberá servizo de autobús, que partirá ás 12:00 horas desde a Casa da Cultura do Milladoiro e que pasará tamén pola praza do Concello de Bertamiráns, efectuando a parada ao carón do lugar reservado para os taxis. A actividade rematará aproximadamente ás 13:30 horas.
