[27-04-2018] Ao longo desta fin de semana, un grupo de rapazas e rapaces de Ames de entre 13 e 18 anos participarán na actividade “Vente de finde”. Organizada pola Oficina Municipal de Información Xuvenil (OMIX) en colaboración coa Aula da Natureza, a iniciativa consistirá na práctica de surf e no contacto co medio natural. A actividade desenvolverase na praia de Razo, no concello de Carballo, e incluirá asemade unha visita guiada á lagoa de Baldaio.
A iniciativa “Vente de finde” busca pór en valor diferentes actividades lúdicas e ambientais, co obxectivo de fomentar a participación e de promover o respecto pola natureza no tempo de lecer da mocidade do concello. Do mesmo xeito, a saída, que está organizada pola Oficina Municipal de Información Xuvenil (OMIX) e pola Aula da Natureza, procura dotar ás mozas e mozos amesáns das ferramentas precisas para traballar a súa autonomía e independencia mediante a cooperación, o respecto e o achegamento ao medio natural.
A actividade realizarase esta fin de semana na comarca de Bergantiños, nun dos destinos de surf e natureza máis importantes de Galicia: a praia de Razo, no concello de Carballo. A saída en autobús producirase este venres, 27 de abril, ás 18:00 horas desde a Casa da Cultura do Milladoiro e ás 18:15h desde a praza do Concello de Bertamiráns.
O sábado, as rapazas e rapaces participantes asistirán pola mañá a unha primeira aula de surf de dúas horas de duración, seguida dunha práctica de actividades de skate para mellorar o equilibrio. Após a comida e o descanso, as mozas e mozos amesáns volverán ter dúas horas de surf, para ao final da tarde realizar unha andaina ata a lagoa de Baldaio. Pola noite, tras a cea, proxectaranse contidos audiovisuais ligados ao mundo do surf.
O domingo pola mañá terá lugar a última das aulas de surf da fin de semana. Unha vez finalizada, as rapazas e rapaces amesáns realizarán unha camiñada ata os acantilados de Razo. Pola tarde, farán novamente actividades de skate. A volta está prevista para as 17:30 horas, chegando a Bertamiráns ás 18:30h e a Milladoiro ás 18:45 horas.
