A Oficina Municipal de Información Xuvenil (OMIX) organizou o pasado sábado, 24 de outubro, un curso de dinamizador/a infantil, que se desenvolveu no centro de usos múltiples de Aldea Nova. Tratouse dun curso gratuíto de 10 horas de formación para poder desenvolver actividades de entretemento e dinamización infantil durante o tempo de lecer dos nenos/as. Esta actividade estivo dirixida aos mozos e mozas maiores de 16 anos.

O curso de dinamizador/a infantil foi impartido por unha escola de tempo libre. Realizouse unha sesión única de 10 horas de formación na que os participantes viron diversos contidos: animación e dinamización; globoflexia; maquillaxe infantil e globoflexia xigante para a decoración.

Tratouse dun curso gratuíto no que as persoas participantes adquiriron unha formación específica en técnicas de animación e dinamización infantil para o tempo de lecer dos nenos/as. O perfil dos participantes foi moi heteroxéneo. Para uns foi o primeiro contacto con esta temática e a outros serviulles para complementar a súa formación de monitor ou educador infantil.

A concelleira de Mocidade, Silvia Dapena, achegouse ata Aldea Nova para saudar as 20 persoas que participaron neste curso e coñecer o seu grao de satisfacción con esta acción formativa. A edil de Mocidade explicou que “un dos seus principais obxectivos é apostar pola formación dos mozos en materia de ocio e tempo libre, atendendo ás múltiples saídas laborais que ofrece este campo”.

As 20 persoas que participaron neste curso disporán dun certificado de asistencia que acredite o correcto aproveitamento desta iniciativa. Nas últimas horas do curso organizouse unha pequena "festa infantil" con nenos e nenas para que o alumnado puxese en práctica o aprendido ao longo do día.