[01-07-2014] A concellaría de Medio Ambiente, a través da Aula da Natureza, organiza todos os anos varias actividades ambientais en colaboración cos centros de ensino do concello de Ames e dos municipios limítrofes. Para rematar o curso 2013-2014 a técnica da Aula da Natureza organizou dúas andainas ambientais nas que participaron un grupo de 50 alumnos/as de 5ª de primaria do CEIP Agro do Muíño e outros grupo de 50 rapaces e rapazas de 3º de primaria do colexio San Xosé de Cluny de Santiago de Compostela. Estas andainas desenvolvéronse polas beiras do río Tambre e por diferentes zonas do río Sar. Ademais, o alumnado do CEIP Agro do Muíño construíu unha maqueta do rio Sar, que se enmarca dentro do proxecto “Móllate pola Sar”.
Andaina ambiental polo río Tambre
A Aula da Natureza estende o seu programa de actividades aos colexios dos concellos limítrofes. Deste xeito, un grupo de 50 rapaces e rapazas de 3º de primaria e 2 profesoras do colexio San Xosé de Cluny, que se atopa en Santiago de Compostela, participaron nunha andaina ambiental polo río Tambre. Esta actividade, que comezou e rematou na área recreativa de Tapia, desenvolveuse durante 9 quilómetros por pistas forestais. Os rapaces e rapazas camiñaron entre carballeiras e puideron coñecer a flora deste lugar de alto valor ambiental.
Unha vez rematada esta andaina o alumnado xantou na praia fluvial de Tapia e tivo tempo libre para participar en diferentes xogos. Tralo tempo de lecer, os rapaces e rapazas participaron nunha observación da fauna propia deste lugar. Para desenvolver esta actividade recolleuse unha mostra de área das beiras do río Tambre na que os nenos e nenas puideron identificar diferentes invertebrados, larvas de libélulas, ras e larvas de cabaliños do demo. Por último, foron ata as dependencias da Aula da Natureza e participaron nun obradoiro de sales de baño.
Outra das actividades nas que participou o alumnado do CEIP Agro do Muíño foi unha andaina ambiental polo río Sar. Un grupo de 50 alumnos/as de educación primaria participou nunha actividade denominada A busca do tesouro do Sar. Os rapaces e rapazas tiveron que buscar o Narcissus cyclamineus, unha especie que é endémica de Galicia e do norte de Portugal. Trátase dunha flor propia dos regos e ríos galegos, que debido ao deterioro que están sufrindo as beiras fluviais comeza a escasear.
O Narcissus cyclamineus está considerada unha especie vulnerable polo que precisa de importantes coidados para evitar a súa desaparición. Esta especie está localizada en varias zonas do río Sar e os rapaces e rapazas que participaron nesta actividade tiveron que buscar estas zonas para limpalas e axudar a expansión desta flor propia das beiras fluviais.
O Concello de Ames, a través da concellaría de Medio Ambiente, colaborou co CEIP Agro do Muíño no desenvolvemento do proxecto “Móllate polo Sar”. O alumnado deste centro de ensino estivo traballando durante este curso sobre diferentes aspecto do río Sar. Ao longo do curso 2013-2014 o alumnado participou en diferentes actividades sobre o río Sar, organizadas polo Concello de Ames, para reforzar o que os rapaces e rapazas aprenderon nas aulas.
Estas actividades remataron coa construción dunha maqueta na que se reproduciu o curso do río Sar dende o seu nacemento en Santiago de Compostela ata a súa desembocadura. Nesta actividade participaron todas as aulas dos alumnos/as de educación infantil e de primaria. Esta maqueta elaborárona nas instalacións da Aula da Natureza e posteriormente trasladárona ata o CEIP Agro do Muíño. O alumnado deste colexio foi pasando polas Aula da Natureza repartido en diferentes grupos para ir construíndo esta maqueta. Esta actividade tamén se enmarca dentro do programa de educación ambiental Voz Natura.