Xa tan só queda un día para poder votar na enquisa, a través da cal a veciñanza amesá pode elixir ao mellor deportista de Ames do ano 2017. Para iso hai que acceder á páxina web do Concello (o banner que está debaixo da sección de vídeos) e votar. Ata o de agora hai un total de 1.693 votos emitidos.

Así, cinco deportistas optan a este premio. Pódese votar polo xogador de squash, Borja Golán Santín, que é profesional do squash desde 2002. Neste ano 2017 logrou o terceiro posto no campionato de Europa, celebrado na cidade inglesa de Nottingham, ademais de proclamarse campión de España por décimo quinta vez. A segunda opción é votar polo xogador de fútbol, Fernando Seoane Antelo, que actualmente xoga como centrocampista no Club Deportivo Lugo da Segunda División de España, sendo unha peza fundamental no equipo con 41 partidos xogados na tempada pasada e un dos capitáns do equipo.

Tamén se pode votar pola patinadora Nadia Iglesias de Salvador, campioa de Europa e medalla de bronce no campionato do mundo júnior de patinaxe artística. A cuarta opción é votar polo boxeador, José Ramón Mirás, tres veces campión de España de peso galo entre 2016 e 2017. Ademais, nesta enquisa pódese votar pola futbolista, Nuria Rábano Blanco, campioa de Europa coa selección Española de Fútbol Feminino sub-19 e actual xogadora do Real Club Deportivo da Coruña.

As votacións pódense realizar ata mañá, 17 de xaneiro de 2018, ás 15:00 horas, na páxina web municipal. O premio do público será entregado na décimo segunda Gala do Deporte. O resto de premios daranse a coñecer, ao igual que nas dúas edicións anteriores, no momento da celebración do evento. Como soe ser habitual este evento reunirá aos clubs e entidades deportivas do concello, así como as deportistas máis destacados durante o 2017 en Ames.