Esta semana volverá a celebrarse unha nova edición do Festival internacional de Maxia de Ames “FestiMax”, unha das actividades culturais máis lonxevas do concello e que máis expectación xeran entre a veciñanza amesá. Na súa XX edición, o festival desenvolverase desde o xoves 23 ata o domingo día 26. 

Na actualidade aínda quedan algunhas entradas dispoñibles para as catro sesións da Gala Máxica Internacional e para a estrea do espectáculo “Imposible?!” do galego Mago Rafa que, para ámbolos dous espectáculos, poden adquirirse a través da Billeteira electrónica. Tamén quedan algunhas prazas libres para as sesións dos obradoiros de maxia que se imparten en Bertamiráns e no Milladoiro. 

Maxia para todos os públicos
A primeira das actividades Do programa do Festimax será “O Baúl da Maxia”, que contará cunha sesión en na Praza de Chavián, en Bertamiráns, o xoves 23, e no aparcadoiro da Casa da Cultura do Milladoiro o venres 24. Esta proposta de pases de maxia, con media hora de duración e con grupos reducidos de 20 persoas, correrá a cargo da maga arxentina Lore Lavand, que adoita mesturar a poesía co mundo da maxia, na súa caravana máxica, un dos teatros máis pequenos do mundo. Os pases desenvolveranse cada media hora desde as 17.30 ata as 20.00 horas e o acceso será de balde, por orde de chegada. 

Unha das novidades desta edición celebrarase na primeira xornada do festival, o espectáculo “Imposible?!” do galego Mago Rafa. A proposta, cun selo moi persoal, está dirixida para un público familiar, terá lugar ás 18.00 horas, o xoves 23, no auditorio da Casa da Cultura do Milladoiro. 

A xornada do venres 24 estará dedicada aos nosos maiores, con dúas sesións de maxia dirixidas especialmente para eles a cargo do mago Román García, tamén de orixe galega e que adoita caracterizarse por crear espectáculos moi creativos e participativos. Deste xeito, ás 11.00 horas desenvolverase o pase no Local dos Maiores de Bertamiráns, mentres que pola tarde, ás 17.00 horas, será a quenda no Milladoiro, no Local de JUPEMI. 

Obradoiros de maxia
Outra das actividades que se realizan de novo este ano serán os obradoiros de maxia, que gozan dunha gran acollida e están dirixidos a rapaces e rapazas de entre 8 e 14 anos. Nesta ocasión, Román García será o encargado de impartir os talleres nos que ensinará aos máis cativos os trucos máis interesantes da maxia. Deste xeito, o sábado 25 de outubro, será a quenda na Casa da Cultura do Milladoiro. Formaranse dous grupos de 12 participantes cada un. A primeira sesión farase ás 11:00h e a segunda a continuación, ás 12:00 horas.

O domingo 26 este mesmo obradoiro impartirase na Casa da Cultura de Bertamiráns. Tamén será impartido por Román García en dúas sesións, ás 11:00 e ás 12:00 horas, e formaranse dous grupos con 12 nenos/as en cada un.

Para participar é necesario inscribirse enviando un correo electrónico ao enderezo cultura@concellodeames.gal poñendo o nome, apelidos da persoa que quere participar no obradoiro de maxia e un número de teléfono de contacto. 

Neste momento, aínda quedan algunhas prazas libres para todas as sesións das dúas localidades. 

Gala máxica internacional
A Gala máxica internacional desta vixésima edición terá lugar o sábado 25 e o domingo 26 de outubro. Como nos últimos anos, haberá catro pases debido á gran demanda e interese que ten este espectáculo entre a veciñanza amesá. A Gala estará presentada polo mago e monologuista catalán Isaac Jurado. 

Nesta ocasión, participarán os magos Seimei, de Corea do Sur e será a primeira vez que actúe en Europa presentando a súa proposta na que os elementos orientais son os protagonistas; Marcos Waldemar, mago galego emerxente que foi galardoado no último Congreso Nacional de Maxia e que estará a presentar unha proposta moi interesante; Peio Rivas, de Vitoria e experto na maxia de manipulación de obxectos, unha das ramas máis complicadas do ilusionismo; e Diego & Elena, dous artistas de Madrid e que presentan un espectáculo no que fusionan as acrobacias aéreas coa maxia.
 
Para máis información pódese chamar aos números de teléfono 981 535 940 / 662 377 444 ou escribir un correo electrónico ao enderezo cultura@concellodeames.gal.