Grandes áreas comerciais ou pequenos comercios? Estradas ou camiños? Houbo moitas discusións sobre o xeito de organizar esa cidade ideal e o remate chegouse a conclusión que había sitio para todo. Así que camiños e estradas conviven con áreas comerciais, comercios pequenos, escolas e un Hospital feito cunha gran caixa de cartón e unha cruz vermella de papel charón. Ningunha alegación a que as distintas partes do Parque Multiaventuras con spá que todos e todas querían se conectara a través de grandes tobogáns acuáticos. Todos os espazos desa cidade para os nenos e as nenas están feitos con materiais de refugallo e a base de imaxinación, postas en común, acordos e consensos. “Trátase, como diría Franchesco Tonuchi de non poñerlle limites a imaxinación e a fantasía dos nenos e das nenas”, manifesta María Roca, coordinadora da Escola de Verán en Bertamiráns.

As emocións, a concienciación medio ambiental, a creatividade, a educación en valores, as relacións persoais, o uso do galego e do inglés que se practica a través dalgúns dos xogos comunitarios, o respecto e a tolerancia á hora de convivir son cuestións que a empresa Agora Aberta, encargada deste programa de conciliación da vida laboral e familiar, ten sempre en conta á hora de elaborar as súas programacións. Este verán Ames foi o obxectivo da mirada, da análise, da reflexión e dos xogos dos nenos e das nenas que acoden a esta escola divertida de verán. Por quincenas traballouse co cole, o parque e a cidade. Moveuse a imaxinación e aflorou a conciencia crítica dos máis pequenos e as máis pequenas que falaron de barreiras arquitectónicas, de limpeza, de zonas verdes e soñaron con parques novos e grandes piscinas e tobogáns de auga que uniran os recunchos dese lugar ideal onde habitar.

Nesta última quincena, a través de todo o que leva implícito a organización dunha campaña electoral e unhas eleccións, eles e elas amosarán como se pode artellar dun xeito cívico e respectuoso ese Ames que a Escola de Verán soña.