[01-07-2015] O Concello de Ames informa de que este martes, 30 de xuño, comezou a segunda fase das obras do paso inferior de Conxo. Debido a iso cortouse totalmente a calzada sentido A Coruña na estrada SC-20 entre o punto quilométrico 7+500 (glorieta de Conxo) e o 7+800 (paso inferior da travesía de Conxo), circulando o tráfico pola calzada sentido Pontevedra cun carril para cada sentido de circulación.
Ademais, mantense a prohibición do xiro á esquerda na mencionada glorieta, para o tráfico sentido Pontevedra e segue prohibido o acceso dende a rúa Sánchez Freire á glorieta, excepto para os autobuses urbanos de liña.
Tanto os desvíos como os itinerarios alternativos recomendados durante esta segunda fase están debidamente sinalizados. As principais alternativas de alta capacidade para chegar dende Santiago ata O Milladoiro e Bertamiráns son a autopista AP 9, continuando pola autovía AG-56, ou empregar a estrada AC-543, que discorre polas localidades de Vidán e Roxos, entre outras.
Cómpre destacar que nunha tramo da autopista AP 9 tamén están realizando obras, polo que en determinados momentos prodúcense retencións puntuais.