[26-04-2016] A compañía Teatro do Noroeste presenta este venres, ás 21:00 horas, na Casa da Cultura do Milladoiro, a súa peza “Palabras Malditas”. Unha obra con texto de Eduardo Alonso e interpretada por Sara Casanova, Miquel Insua e Luma Gómez. As persoas que desexen acudir a ver esta obra de teatro xa poden mercar as entradas na Billeteira electrónica municipal.
A trama de Palabras Malditas cobra vida no ambiente gris e opresor dos anos 40; unha etapa marcada polos asasinatos, a represión, a pobreza e a fame. Na cidade da Coruña, na rúa Panaderos, na pensión de dona Ermitas, coñécense o mestre Vicente Rincón e unha rapaza chamada Clara. O primeiro fuxe da represión franquista, a segunda, sen familia nin fogar, non ten a onde ir. A poesía será o primeiro fío dunha unión que derivará nunha profunda amizade. Clara e Vicente pasarán as súas tardes xogando coas palabras, lendo e escribindo versos que partillarán o un co outro, buscando fuxir coa mente do ambiente escuro deses días.
As entradas para a obra estarán á venda na Billeteira electrónica ata dúas horas antes do comezo do espectáculo. A partir das 20:00 horas poderanse mercar as entradas na propia Casa da Cultura do Milladoiro. O prezo da entrada xeral é de 5 euros, e o reducido -para persoas maiores de 65 anos, menores de 12 anos e estudantes con carné- é de 2,5 euros.
