O primeiro mes dos “Seráns de Ames” chega ao seu fin cunha xornada adicada aos contos e á narración oral no campo da festa de Bugallido. Deste xeito, os espectáculos “A bibliotecaria estrafalaria”, de Cris de Caldas e Xabi do Camiño, e “Nabiza Girl”, de Isabel Risco, ofrecerán dúas propostas para todos os públicos, na que é a segunda parada dos “Seráns de Ames” en Bugallido, despois do concerto do grupo La Nasa o pasado xoves 14.

En “A bibliotecaria estrafalaria”, Cris de Caldas e Xabi do Camiño comparten os contos de Candelaria, unha bibliotecaria que compartiu con eles os libros e historias máis asombrosas e espectaculares. Trátase dun conxunto de contos pop-up, libros de xogos, libros grandes e libros pequenos, que deleitarán tanto ás crianzas como ao público adulto.

Pola súa banda, con “Nabiza Girl”, a actriz e clown Isabel Risco introdúcenos a Chelo García Naveira, máis coñecida como Nabiza Girl, unha superheroína rural galega moi particular. A través do seu peculiar humor, a protagonista fiará varias historias absurdas sobre a súa vida, coas súas aventuras e as desventuras.

Con esta actividade chégase ao ecuador dos “Seráns de Ames”, dos que restan catro paradas ao longo do mes de agosto. As seguintes propostas serán o xoves 4 de agosto en Tapia, coa representación da obra “A illa do tesouro”, da compañía Ghazafelhos, e o xoves 11 de novo en Bugallido, cunha sesión de contacontos con Bibiana Calvo e Divina Fernández e o espectáculo “A tropa do Doutor Milagre”.