As Leoas do voleibol español continúan a súa preparación en Galicia de cara aos seis partidos que compoñen a fase clasificatoria para o campionato de Europa 2023, o EuroVolley. Dende o pasado luns 25 de xullo, as xogadoras do combinado español están a adestrar en Noia, onde arrincarán este sábado 6 ante Hungría unha serie de catro encontros amigables, previos á súa estrea no Preeuropeo.

Neste senso, a seguinte parada da selección será Bertamiráns, onde este domingo 7 xogarán un novo partido contra o equipo húngaro. O amigable terá lugar no pavillón polideportivo da vila, a partir das 19:00 horas, con entrada libre e de balde.

A próxima semana, as Leoas viaxarán a Suíza para disputar os días 13 e 14 de agosto dous amigables contra o combinado helvético, que servirán para pechar a preparación para a fase clasificatoria. O debut no Preeuropeo do equipo español será en Dinamarca o día 20 de agosto contra a selección do país, un dos tres rivais de España no grupo E, formado tamén por Letonia e Eslovaquia.

O Preeuropeo continuará os días 24 e 27 de agosto, nos que España se medirá ante Eslovaquia e Letonia en Gijón e Avilés, respectivamente. Os tres partidos restantes terán lugar en Letonia e Eslovaquia, ante as seleccións locais, e en Alacante ante Dinamarca, os días 4, 7 e 11 de setembro.

Novas relacionadas:

Enfoques: "La Selección Española Femenina de Voleibol jugará un amistoso contra Hungría este domingo en Bertamiráns"

AMSGO!: "A selección española feminina de voleibol enfróntase a Hungría o domingo en Bertamiráns"