A Escola de Karate Dokkodo contou con representación nas dúas modalidades. En kumite participaron Jadel Rodríguez, Martina Barreiro e Xian Blanco; en kata, Vera Quintás e Mateo Quintás; mentres que Tiago Blanco participou tanto en kata como en kumite.

A concentración desenvolveuse ao longo de tres días, con catro sesións de adestramento e moitas horas de traballo sobre o tatami. Foi unha experiencia esixente, na que os seis deportistas tiveron que manter a concentración e dar o mellor de si en cada sesión.

Para os seis karatekas do Dokkodo foi unha oportunidade para compartir tatami con outros deportistas de moi alto nivel, afrontar novas esixencias e comprobar a súa evolución nun contexto diferente ao habitual.

Desde e Escola de Karate Dokkodo indican que “foron tres días moi intensos. Catro sesións de adestramento que fixeron sacar o mellor de cada un deles. Este tipo de experiencias son moi importantes porque permiten aos deportistas comprobar onde están, afrontar novos retos e, sobre todo, seguir tendo ganas de mellorar”.

Ademais, desde a Escola de Karate Dokkodo destacan especialmente a actitude dos seis deportistas durante toda a concentración. A participación nunha actividade deste nivel representa tamén un estímulo para continuar co traballo de tecnificación que o club desenvolve ao longo da tempada.

A experiencia pecha así unha fin de semana de moito traballo para os seis representantes do Dokkodo, que regresan con máis horas de tatami, novas aprendizaxes e, sobre todo, coa motivación de seguir traballando para afrontar os próximos retos.