O contrato ten por obxecto ás obras de ampliación do actual pavillón polideportivo de Bertamiráns, cun novo módulo na súa ala sur. Este novo espazo atenderá, preferentemente, ás actividades de voleibol e baloncesto. Preséntase como unha prolongación ou anexo do actual, de tal forma que o lado curto do pavillón se convertería no lado longo do novo.

Con esta ampliación preténdese acadar varios obxectivos. Por unha banda, atenderase a numerosa demanda de actividade de voleibol, patinaxe e baloncesto. Ademais reformula e adapta a deficiente proporción actual do edificio. E, por último, reurbaniza e reordena o entorno inmediato, resolvendo os problemas de circulación no aparcadoiro.

O proxecto técnico da obra foi redactado por Salgado e Liñares arquitectos. O prazo máximo de execución das obras é de 6 meses salvo que por circunstancias sobrevidas, imprevistas, ou calquera outra que poida xurdir durante a execución do mesmo se acorde polo órgano de contratación a concesión dunha prórroga. Esta prórroga deberá xustificarse motivadamente.

Condicións especiais de execución
Co fin de dar cumprimento ás esixencias sociais na contratación pública, inclúese a condición de que os adxudicatarios deberán contratar unha muller desempregada a xornada completa. Tamén se deberá dar cumprimento á normativa sectorial de protección de datos de carácter persoal, tanto estatal como europea.

Para a concelleira de Deportes, Susana Señorís, facer investimentos en instalacións deportivas é moi necesario: “Temos un gran número de usuarios e usuarias das instalacións deportivas do Concello. Esta ampliación vai a facilitar moito a práctica do deporte en xeral e dalgunhas disciplinas en particular porque deste xeito as actividades poderán repartirse mellor entre as distintas instalacións coas que contamos”.

Novas relacionadas:

El Correo Galego: "Sae a concurso a ampliación do pavillón de Bertamiráns"