O Concello de Ames, a través do departamento de Promoción da Saúde, organiza unha nova andaina saudable para o mes de xullo. Trátase da cuarta etapa do Camiño de Santiago dende o Barbanza, un recorrido de 120 quilómetros que parte dende o Faro de Corrubedo e pasa por diversos lugares da ría de Arousa, atravesando cidades e pobos costeiros como Ribeira, A Pobra do Caramiñal, Boiro e Rianxo ata enlazar co Camiño Portugués ao chegar a Padrón.

Hai 70 prazas dispoñibles, e as persoas interesadas en anotarse poden facelo ata o mércores, 28 de xuño, ás 14:00 horas, cubrindo o formulario ao que se pode acceder a través desta ligazón ou mediante o código QR do cartaz.

Ofrecerase servizo de autobús dende a praza do Concello de Bertamiráns (ás 9:00 horas) e dende a Casa da Cultura do Milladoiro (ás 9:15 horas). Debido á alta demanda en anteriores andainas, terán prioridade as persoas empadroadas en Ames. Recoméndase levar roupa e calzado axeitados.

Ruta da cuarta etapa do Camiño
A cuarta etapa do camiño “A orixe” comeza na igrexa de Santiago do Deán, onde se rematou a anterior andaina, para pasar polo pazo de Aguiar e o pazo do Couto. Saíndo da zona urbana e adentrándose na área rural, os paseantes cruzarán o río Pedras e o río Lerez. Posteriormente, sairán á estrada e poderán visualizar o pazo e a capela da Mercede.

Uns quilómetros máis adiante chégase ao porto de Escarabote. Tras ver a igrexa de Santiago do Lampón, pásase ao concello de Boiro. Os participantes atravesarán o casco urbano para seguir baixando cara ao pase marítimo que bordea a praia de Barraña.

Xa ao final do areal, pásase polo peirao da Telleira, e séguese avanzando ata a praia de Esteiro. Finalmente, éntrase no porto de Cabo de Cruz, pasando xunto ao porto deportivo e o antigo porto de pescadores.